ബാലരാമപുരം: ഗൃഹാധിഷ്ഠിത വിദ്യാഭ്യാസം നേടുന്ന കൂട്ടുകാർക്ക് കാരുണ്യസ്പർശമായി ചങ്ങാതിക്കൂട്ടമെത്തി. സമഗ്ര ശിക്ഷ കേരള ബാലരാമപുരം ബി.ആർ.സിയുടെ നേതൃത്വത്തിൽ ഭിന്നേശേഷിയുള്ള നാല് കൂട്ടുകാരുടെ വീടുകളിൽ കൈനിറയെ സമ്മാനങ്ങളും പഠനസാമഗ്രികളുമായി വിദ്യാർത്ഥികളെത്തിയത്. എം.എസ്.എസി.എൽ.പി.എസിലെ അഷ്ബാക്ക്, വെങ്ങാനൂർ സെന്റ് അലോഷ്യസ് എൽ.പി.എസിലെ കാർത്തിക, മുടിപ്പുരനട എൽ.പി.എസിലെ അജീഷ്, മരുതൂർക്കോണം പി.ടി.എം വി.എച്ച്.എസ് എസിലെ ദിവിൻ എന്നീ കുട്ടികളാണ് വിവിധ വൈകല്യങ്ങൾ കാരണം സ്കൂളിലെത്താനാകാതെ വീട്ടിൽ കഴിയുന്നത്. പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി റിസോഴ്സ് അദ്ധ്യാപകർ ഭിന്നേശേഷി വിദ്യാർത്ഥികളുടെ സ്കൂളിലെത്തി പഠനപ്രവർത്തനങ്ങൾ നൽകാറുണ്ട്. ഇവർക്കാവശ്യമായ സി.പി ചെയർ, വാക്കർ, ഫിസിയോ ബാൾ, കിടക്കകൾ തുടങ്ങിയവയാണ് കുട്ടികൾ സമ്മാനിച്ചത്. ബാലരാമപുരത്ത് സമഗ്ര ശിക്ഷാ ജില്ലാ പ്രോജക്ട് കോ-ഓർഡിനേറ്റർ രത്നകുമാർ, ഗ്രാമപഞ്ചായത്ത് പ്രസിഡന്റ് ആർ.എസ്. വസന്തകുമാരി, വൈസ് പ്രസിഡന്റ് ഷാമിലാബീവി, ഡി.പി.ഒ ശ്രീകുമാരൻ, ബി.പി.ഒ എസ്.ജി. അനീഷ്, എസ്.എൽ. റെജി, വെങ്ങാനൂർ ഗ്രാമപഞ്ചായത്ത് സ്ഥിരം സമിതി അദ്ധ്യക്ഷ ജയകുമാരി, വാർഡ് മെമ്പർ മിനി വേണുഗോപാൽ എന്നിവർ പങ്കെടുത്തു.