കിളിമാനൂർ: കിളിമാനൂർ ഉപജില്ലയിൽ അക്കാഡമിക അക്കാഡമികേതര മികവിൽ മികവുറ്റ പ്രകടനം കാഴ്ചവെക്കുന്ന വഞ്ചിയൂർ യു .പി എസിലെ കുരുന്നുകൾ ഇനി ഐ ടി മേഖലയിലും കുതിക്കും. പ്രമുഖ ഐ.ടി കമ്പനിയായ യു.എസ്.ടി ​ഗ്ലോബലാണ് സ്കൂളിലെ വിവരവിനിമയ സാങ്കേതികവിദ്യയിൽ കുതിച്ച് ചാട്ടത്തിന് ഉതകുന്ന പദ്ധതികളുമായി രം​ഗത്തെത്തിയത്. യു.എസ്.ടി ​ഗ്ലോബൽ നടപ്പിലാക്കുന്ന അഡോപ്റ്റ് എ സ്കൂൾ പദ്ധതിയുടെ ഭാ​ഗമായാണ് സ്കൂളിനെ ഏറ്റെടുത്തത്.ജില്ലയിൽ 13 സ്കൂളുകളിലാണ് പദ്ധതി നടപ്പിലാക്കുന്നത്. കിളിമാനൂർ സബ് ജില്ലയിൽ പദ്ധതിക്കായി തെരഞ്ഞെടുത്ത ഏക സ്കൂളും വഞ്ചിയൂർ ​ഗവ :യു.പിഎസാണ്. സന്നദ്ധ സംഘടനയായ കളർറോസും പദ്ധതിക്ക് ഒപ്പമുണ്ട്. പദ്ധതിയുടെ ഭാ​ഗമായി 8 കമ്പ്യൂട്ടറുകൾ സ്കൂളിന് സൗജന്യമായി നൽകും. ഇന്റർനെറ്റ് സംവിധാനവും ഏർപ്പെടുത്തും. കമ്പനിയുടെ പ്രതിനിധികൾ എല്ലാ വ്യാഴാഴ്ചയും സ്കൂളിലെത്തി കുട്ടികൾക്ക് പരിശീലനവും നൽകും. ഇതോടൊപ്പം എം.എസ്.ഓഫീസ് എന്ന സർട്ടിഫിക്കറ്റ് കോഴ്സ് കുട്ടികളെ പരിശീലിപ്പിക്കും. പദ്ധതിയുടെ വിശദീകരണയോ​ഗം യു.എസ്.ടി ​ഗ്ലോബൽ അക്കൗണ്ട്സ് മാനേജർ തോമസ് ജോൺസൺ ഉദ്ഘാടനം ചെയ്തു. സ്കൂൾ ലീഡർ അമൃത അദ്ധ്യക്ഷയായി. അഭിലാഷ്, ബബിത, ചന്ദന, യാസർ അഹമ്മദ് തുടങ്ങിയവർ സംസാരിച്ചു. പ്രഥമാദ്ധ്യാപിക പുഷ്കല സ്വാ​ഗതവും ഭ​ഗവത് രജീവ് നന്ദിയും പറഞ്ഞു.