തിരുവനന്തപുരം: ന്യൂഡൽഹിയിൽ റിപ്പബ്ലിക് ദിന പരേഡിലും രാജ്പഥ് മാർച്ചിലും പ്രധാനമന്ത്രിയുടെ റാലിയിലും പങ്കെടുത്ത് തിരികെയെത്തിയ എൻ.സി.സി കേഡറ്റുകൾക്കും ഓഫീസർമാർക്കും രാജ്ഭവനിൽ ഗവർണർ ആരിഫ് മുഹമ്മദ് ഖാൻ സ്വീകരണം നൽകി. കേഡറ്റുകൾ റിപ്പബ്ലിക് ദിന പരേഡ് അനുഭവങ്ങൾ ഗവർണറുമായി പങ്കുവച്ചു. 116 എൻ.സി.സി കേഡറ്റുകൾ, കണ്ടിജന്റ് കമാൻഡർ കേണൽ ജയകൃഷ്‌ണൻ, 15 അംഗ പരിശീലകർ എന്നിവരാണ് ടീമിലുണ്ടായിരുന്നത്. സ്വീകരണ ചടങ്ങിൽ ബ്രിഗേഡിയർ എസ്.എൽ. ജോഷി, ഒഫിഷ്യേറ്റിംഗ് അഡിഷണൽ ഡയറക്ടർ ജനറൽ, തിരുവനന്തപുരം ഗ്രൂപ്പ് കമാൻഡർ ബ്രിഗേഡിയർ ജി.ജെ.എസ്. ബഗിയാന, ഡയറക്ടർ കേണൽ എസ്. ഫ്രാൻസിസ് തുടങ്ങിയവർ പങ്കെടുത്തു.