തിരുവനന്തപുരം: സർവകലാശാലയുടെ എൻജിനിയറിംഗ് പരീക്ഷയ്ക്ക് കോളേജിൽ നടന്ന പരീക്ഷയിലെ ചോദ്യം അതേപടി കോപ്പിയടിച്ച അദ്ധ്യാപികയെ സാങ്കേതിക സർവകലാശാല ചോദ്യപേപ്പർ തയ്യാറാക്കുന്നതിൽ നിന്നും 5 വർഷത്തേക്ക് ഡീബാർ ചെയ്തു.

സ്വിച്ചിംഗ് തിയറി ആൻഡ് ലോജിക് ഡിസൈൻ എന്ന വിഷയത്തിലെ യൂണിവേഴ്‌സി​റ്റി പരീക്ഷയിൽ തിരുവനന്തപുരം ഗവ. എൻജിനിയറിംഗ് കോളേജിലെ സീരീസ് പരീക്ഷയിലെ ചോദ്യങ്ങൾ അതേപോലെ ആവർത്തിച്ചതിനെത്തുടർന്ന് പരീക്ഷ റദ്ദാക്കിയിരുന്നു. സിൻഡിക്കേ​റ്റ് ഉപസമിതി നടത്തിയ അന്വേഷണത്തിൽ യൂണിവേഴ്‌സി​റ്റി പരീക്ഷയിലെ ചോദ്യപേപ്പർ തയ്യാറാക്കിയതിൽ ഗുരുതരമായ വീഴ്ചയുണ്ടായെന്ന് കണ്ടെത്തി. പുനഃപരീക്ഷ നടത്തിയതിന്റെ മുഴുവൻ ചെലവും അദ്ധ്യാപികയിൽ നിന്നു പിഴയായി ഈടാക്കും.

ഹർത്താൽ: പരീക്ഷയെഴുതാൻ

കഴിയാത്തവർക്ക് പുനഃപരീക്ഷ

ഡിസംബർ 17 ഹർത്താൽ ദിനത്തിൽ പരീക്ഷ എഴുതാൻ കഴിയാതിരുന്ന വിദ്യാർത്ഥികൾക്ക് പുനഃപരീക്ഷ നടത്താൻ സിൻഡിക്കേറ്റ് യോഗം തീരുമാനിച്ചു. പുനർമൂല്യനിർണയത്തിലെ അപാകതകൾ പരിഹരിക്കാൻ അക്കാഡമിക് കൗൺസിൽ നിർദേശിച്ച റിവ്യൂ സംവിധാനം സിൻഡിക്കേ​റ്റ് യോഗം അംഗീകരിച്ചു. ബിരുദ, ബിരുദാനന്തര കോഴ്‌സുകളുടെ പ്രൊവിഷണൽ സർട്ടിഫിക്ക​റ്റുകളും സംയുക്ത ഗ്രേഡ് കാർഡും വിദ്യാർത്ഥികൾക്ക് അടുത്ത അദ്ധ്യയന വർഷം മുതൽ ഓൺലൈനായി ലഭ്യമാക്കും. അക്കാഡമിക് ഓഡി​റ്റിംഗിൽ മികവ് പുലർത്താത്ത പത്ത് കോളേജുകളിൽ സർവകലാശാല സിൻഡിക്കേ​റ്റ് അംഗങ്ങളുടെ നേതൃത്വത്തിലുള്ള സംഘം ഉടൻ പരിശോധന നടത്തും.