നെയ്യാറ്റിൻകര : മാരായമുട്ടത്ത് യൂത്ത് കോൺഗ്രസ് മണ്ഡലം പ്രസിഡന്റിനെ ആക്രമിച്ച ഡി.സി.സി സെക്രട്ടറിക്കെതിരെ വധശ്രമത്തിന് പൊലീസ് കേസെടുത്തു. യൂത്ത് കോൺഗ്രസ് പെരുങ്കടവിള മണ്ഡലം പ്രസിഡന്റിന് മാരായമുട്ടം കാക്കോട്ടുകുഴി ബഥനീസിൽ ഇടവഴിക്കര ജയനെ (36) ആക്രമിച്ചതിനാണ് ഡി.സി.സി. സെക്രട്ടറി മരായമുട്ടം സുരേഷിനെതിരെ വധശ്രമത്തിന് മാരായമുട്ടം പൊലീസ് കേസെടുത്തത്.തലയിൽ കമ്പിപ്പാര കൊണ്ട് അടിയേറ്റ ജയൻ തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിലാണ്. ആക്രമണം നടത്തിയത് ഡി.സി.സി. സെക്രട്ടറി മാരായമുട്ടം സുരേഷിനൊപ്പം കർഷക കോൺഗ്രസ് നേതാവ് പുനയൽ സന്തോഷിനേയും പൊലീസ് പ്രതി ചേർത്തിട്ടുണ്ട്. മുൻവൈരാഗ്യമാണ് ആക്രമണത്തിനു പിന്നിലെന്ന് മാരായമുട്ടം പൊലീസ് പറഞ്ഞു. തിങ്കളാഴ്ച വൈകിട്ട് നാലര മണിയോടെയാണ് സംഭവം. മാരായമുട്ടം സഹകരണ ബാങ്കിൽ ജയന്റെ പരിചയക്കാരനായ ആൾ തുക പിൻവലിക്കാൻ എത്തിയിരുന്നു. കൂടെ ജയൻ ബാങ്കിൽ എത്തിയപ്പോഴാണ് ആക്രമണം.