തിരുവനന്തപുരം: ആറ്റുകാൽ പൊങ്കാല മഹോത്സവത്തിനുള്ള ഒരുക്കങ്ങൾ പുരോഗമിക്കുന്നു. പൊങ്കാലയ്ക്ക് മുന്നോടിയായി വിവിധ വകുപ്പുകൾ നടത്തേണ്ട പ്രവൃത്തികൾ രണ്ടാഴ്ചയ്ക്കകം പൂർത്തീകരിക്കാൻ മന്ത്രി കടകംപള്ളി സുരേന്ദ്രൻ നിർദ്ദേശം നൽകി. ഉത്സവമേഖലയായ 31വാർഡുകളിലെ റോഡുകളുടെ അറ്റകുറ്റപ്പണികളും നിർമ്മാണ പ്രവർത്തനങ്ങളും യുദ്ധകാലാടിസ്ഥാനത്തിൽ പൂർത്തിയാക്കാൻ മന്ത്രി നിർദ്ദേശിച്ചു. ആറ്റുകാൽ ക്ഷേത്ര ആഡിറ്റോറിയത്തിൽ ചേർന്ന അവലോകന യോഗത്തിൽ മേയർ കെ. ശ്രീകുമാർ, വി.എസ്. ശിവകുമാർ എം.എൽ.എ, ശശി തരൂർ എം.പി, കളക്ടർ കെ.ഗോപാലകൃഷ്ണൻ, സിറ്റി പൊലീസ് കമ്മിഷണർ ബൽറാംകുമാർ ഉപാദ്ധ്യായ തുടങ്ങിയവർ പങ്കെടുത്തു.

പൊങ്കാല ദിവസമായ മാർച്ച് 9ന് ജില്ലയ്ക്ക് പ്രാദേശിക അവധി ആയിരിക്കുമെന്ന് മന്ത്രി അറിയിച്ചു.

പൊങ്കാല ഉത്സവത്തിന്റെ സുഗമമായ നടത്തിപ്പിന് നോഡൽ ഓഫീസറായി എ.ഡി.എം വി.ആർ. വിനോദിനെ ചുമതലപ്പെടുത്തി.

തീരുമാനങ്ങൾ

എസ്.എസ്.എൽ.സി, പ്ലസ് ടു പരീക്ഷകൾ കണക്കിലെടുത്ത് പൊലീസിന്റെ അനുവാദം കൂടാതെയും നിശ്ചിത പരിധിയിൽ കൂടുതൽ ശബ്ദത്തിലും ഉച്ചഭാഷിണികൾ ഉപയോഗിക്കുന്നത് തടയും

ഓരോ സംഘടനകൾക്കും രണ്ട് സ്‌പീക്കറുകൾ വീതമാണ് അനുവദിക്കുക

വിരുദ്ധമായും അനുമതി ഇല്ലാതെയും പ്രവർത്തിക്കുന്നവർക്കെതിരെ കർശന നടപടിയെടുക്കും

ഫയർ ഫോഴ്സിനെ വിന്യസിക്കും

അഗ്നി ശമനോപകരണങ്ങൾ ഉപയോഗിക്കുന്നതിന് ക്ഷേത്രജീവനക്കാർക്ക് കൂടി പരിശീലനം നൽകും

ഗ്രീൻ പ്രോട്ടോക്കോൾ പാലിക്കുന്നതിനായി അന്നദാനവും കുടിവെള്ള വിതരണവും നടത്തുന്ന സംഘടനകൾക്ക് രജിസ്‌ട്രേഷൻ നിർബന്ധമാക്കും

പൊങ്കാല ഉത്സവം പ്ലാസ്റ്റിക് വിമുക്തമാക്കുന്നതിനായി ഭക്തജനങ്ങളും സന്നദ്ധ സംഘടനകളും സ്റ്റീൽ പാത്രങ്ങളും കപ്പുകളും ഉപയോഗിക്കുന്നതിന് ബോധവത്കരണം നടത്തും

പൊങ്കാല കഴിഞ്ഞുള്ള ശുചീകരണ പ്രവർത്തനം നടത്താൻ 2250 ജീവനക്കാരെ നിയോഗിക്കും

60 ടിപ്പർ ലോറികൾ കൂടി ശുചീകരണത്തിനായി നഗരസഭ വാടകയ്ക്ക് എടുക്കും

ഇഷ്ടികകൾ ശേഖരിച്ച് പാവപ്പെട്ടവർക്കുള്ള വീട് നിർമ്മാണത്തിന് നൽകും

സുരക്ഷ

പൊങ്കാല ഉത്സവദിനത്തിലെ സുരക്ഷയ്ക്കായി 3500 പൊലീസുകാരെ നിയോഗിക്കും.

രണ്ടായിരം വനിതാ പൊലീസുകാർക്കാണ് സുരക്ഷാചുമതല

മോഷണം തടയുന്നതിനായി പ്രത്യേക സ്‌ക്വാഡുകൾ രൂപീകരിക്കും

പ്രത്യേക ബൈക്ക് പട്രോളിംഗ് സംഘങ്ങളെയും നിയോഗിക്കും.

സിസി ടിവി കാമറകൾക്ക് പുറമേ ഡ്രോണിൽ ഘടിപ്പിച്ച കാമറകൾ വഴിയും നിരീക്ഷണം

കിള്ളിപ്പാലം പി.ആർ.എസ് ജംഗ്ഷനിൽ നിന്ന് ക്ഷേത്രത്തിലേക്കുള്ള ബണ്ട് റോഡ് സുരക്ഷാ പാതയാക്കും.

25ട്രാഫിക് വാർഡൻമാരെ പ്രത്യേകം നിയോഗിക്കും

ക്രമീകരണം
ഭക്തർക്ക് പ്രാഥമികാവശ്യങ്ങൾ നിറവേറ്റുന്നതിന് ബയോടോയ്‌ലെറ്റുകളും പോർട്ടബിൾ ടോയ്‌ലെറ്റുകളും സജ്ജമാക്കും

അടിയന്തര വൈദ്യ സഹായം ലഭ്യമാക്കുന്നതിന് മെഡിക്കൽ ടീമിനെ നിയോഗിക്കും

ആറ്റുകാൽ ഉത്സവദിവസങ്ങളിൽ കെ.എസ്.ആർ.ടിസി ചെയിൻ സർവീസ് നടത്തും

 മുന്നൂറിലധികം ബസുകളാണ് ഇത്തവണ സർവീസ് നടത്തുന്നത്

9 പ്രത്യേക ട്രെയിൻ സർവീസുകളും കൂടുതൽ സ്റ്റോപ്പുകളും ആറ്റുകാൽ പൊങ്കാല ദിവസം ഉണ്ടാകും