തിരുവനന്തപുരം: തമ്പാനൂർ സെൻട്രൽ റെയിൽവേ സ്റ്റേഷനിൽ ആരംഭിച്ച റെന്റ് എ കാർ സേവനത്തിനു മികച്ച പ്രതികരണം. 0484 7136581 എന്ന നമ്പറിൽ വിളിച്ചു കാറുകൾ മുൻകൂറായി ബുക്ക് ചെയ്യാം. ദിവസവും ഇരുനൂറിലേറെ ബുക്കിങ്ങുകൾ എത്തുന്നുണ്ടെന്നാണ് അധികൃതർ പറയുന്നത്. വാടകയ്ക്ക് എടുത്ത് സ്വയം ഓടിച്ചു പോകാൻ കഴിയുന്ന കാറുകൾ നൽകുന്നത് ഇൻഡസ് ഗോയാണ്.

വേണ്ടത് ആധാർ കാർഡും ലൈസൻസും

ലളിതമായ നടപടിക്രമങ്ങളിലൂടെ ആർക്കും കാറുകൾ വാടകയ്ക്ക് എടുക്കാം. രേഖകളായി ആധാർ കാർഡുംലൈസൻസും നൽകണം. ഇവ ഫോട്ടോ കോപ്പി എടുത്തതിനു ശേഷം തിരിച്ച നൽകും. സെക്യൂരിറ്റി ഡെപ്പോസിറ്റായി പ്രത്യേകം തുക ഈടാക്കുന്നില്ല എന്നതാണ് മറ്റൊരു പ്രത്യേകത. 24 മണിക്കൂറും സർവീസ്, ബ്രെക്ഡൗൺ സഹായം ഇവർ നൽകും. കാറിൽ എ.ബി.എസ്. ജി.പി.എസ് എന്നിവ സജ്ജീകരിച്ചിട്ടുണ്ട്.

അഞ്ഞൂറ് രൂപ മുതൽ പാക്കേജുകൾ

അഞ്ച് മണിക്കൂറിനു 500 രൂപ മുതൽ പല തരത്തിലുള്ള പാക്കേജുകൾ ലഭ്യമാണ്. 500 രൂപയ്ക്ക് മാരുതി സെലേറിയോ കാർ ലഭിക്കും. ഹോണ്ട സിറ്റി, മഹിന്ദ്ര എക്സ്.യു.വി, ടൊയോട്ട ഇന്നോവ ക്രിസ്റ്റ, ഫോർച്യൂണർ എന്നിങ്ങനെ ഇഷ്ടപ്പെട്ട വാഹനങ്ങൾ സ്വന്തമായിട്ട് ഓടിച്ചു പോകാം. ഓട്ടോമാറ്റിക് , മാനുവൽ ഗിയർ ഓപ്‌ഷനുകളുള്ള കാറുകൾ ഇഷ്ടാനുസരണം തെരഞ്ഞെടുക്കാം.

ഒരു ദിവസം, ഒരാഴ്ച, ഒരു മാസം എന്നിങ്ങനെ വ്യത്യസ്ത കാലയളവുകളിലേയ്ക്ക് വാഹനങ്ങൾ കിട്ടും. ശനി, ഞായർ ,പൊതു അവധി ദിവസങ്ങളിൽ നിരക്കുകളിൽ നൂറു രൂപയുടെ വ്യത്യാസമുണ്ടാകും. റെയിൽവേ സ്റ്റേഷന് മുന്നിലുള്ള കൗണ്ടറിൽ നിന്നും ഇഷ്ടമുള്ള കാറുകൾ തെരഞ്ഞെടുക്കാം.

നിശ്ചയിക്കപ്പെട്ടതിലും അധികം ഓടുന്ന കിലോമീറ്ററിന് ഏഴു രൂപ മുതൽ ഈടാക്കും.

വാടകയ്ക്ക് എടുക്കുന്ന വാഹനങ്ങൾ കൈകാര്യം ചെയ്യുമ്പോൾ അൽപ്പം ശ്രദ്ധിക്കണമെന്ന് അധികൃതർ മുന്നറിയിപ്പും നൽകുന്നു. യാത്രയ്ക്കിടെ അപകടം എന്തെങ്കിലും സംഭവിച്ചാൽ അറ്റകുറ്റപണിയുടെ അത്തരവാദിത്തവും വാടകയ്ക്ക് എടുക്കുന്നയാൾ വഹിക്കേണ്ടി വരും.