ആ​റ്റിങ്ങൽ: ജനങ്ങൾ തിങ്ങി പാർക്കുന്ന നഗരത്തോട് ചേർന്നു കിടക്കുന്ന പ്രദേശമായ കച്ചേരി ജംഗ്ഷനിലെ എം.ആർ ലൈൻ റോഡ് ടാറും മെ​റ്റലുമിളകി കുഴികൾ നിറഞ്ഞ് കിടക്കാൻ തുടങ്ങിയിട്ട് വർഷം മൂന്നാകുന്നു. നഗരസഭയിലെ പ്രധാന ഇടറോഡായിട്ടും ധാരാളം വാഹനങ്ങൾ ദിവസവും കടന്നുപോകുന്ന വഴിയായിട്ടും റോഡ് നന്നാക്കാൻ അധികൃതർ തയ്യാറാകുന്നില്ല.

ആറ്റിങ്ങൽ ദേശീയപാതയിൽ ചെറു വാഹനങ്ങളുടെ ബൈപാസുപോലെ പ്രവർത്തിക്കുന്ന ഈ റോഡിന്റെ അവസ്ഥ ഏറെ ദുരിതമാണ്. പലയിടത്തും ടാർ കാണാനില്ല. കൂടാതെ റോഡ് നിറയെ കുഴികൾ രൂപപ്പെട്ടിരിക്കുകയാണ്. ബൈക്ക് യാത്രക്കാരാണ് ഏറെ ബുദ്ധിമുട്ടുന്നത്. കുണ്ടും കുഴിയും നിറഞ്ഞ ഈ റോഡിലൂടെ പോകുമ്പോൾ ശ്രദ്ധ തെറ്റിയാൽ തെന്നിവീണതു തന്നെ.

മുന്നൂറ് മീ​റ്ററിനകത്ത് ദൈർഘ്യമുള്ളതാണ് ഈ റോഡ്. കൊല്ലമ്പുഴ,​ വീരകേരളം ക്ഷേത്രം,​ ഗേൾസ് ഹൈസ്കൂൾ,​ കുഴിയിൽ മുക്ക്,​ മാർക്കറ്റ് റോഡ് തുടങ്ങിയ സ്ഥലങ്ങളെ ബന്ധിപ്പിക്കുന്ന ഈ റോഡിൽ നിന്ന് ഉള്ളിലേക്ക് തിരിഞ്ഞുപോകുന്ന മ​റ്റ് ഇട റോഡുകളുമുണ്ട്. ദിവസവും നിരവധി സ്കൂൾ വാഹനങ്ങളാണ് ഇതുവഴി വന്നു പോകുന്നത്. റോഡ് തകർന്നതോടെ കാൽനടയാത്രക്കാരും ബുദ്ധിമുട്ടിലാണ്. അഞ്ചു വർഷത്തിലധികമായി റോഡ് ടാർ ചെയ്തിട്ട്. നാട്ടുകാർ റോഡിൽ വാഴ നട്ട് പ്രതിഷേധിച്ചിട്ടും അധികൃതർക്ക് യാതൊരു കുലുക്കവുമില്ല.