വെഞ്ഞാറമൂട്: ലോഡ്‌ജിൽ മുറിയെടുത്ത ശേഷം ടി.വിയുമായി മുങ്ങിയ യുവാവിന്റെ ദൃശ്യം സി.സി ടി.വിയിൽ നിന്നും ലഭിച്ചു. വെഞ്ഞാറമൂട് എ.ബി റസിഡൻസിയിൽ ശനിയാഴ്ചയായിരുന്നു സംഭവം. വ്യാഴാഴ്ച വൈകിട്ടോടെ ലോഡ്‌ജിലെത്തിയ ഇയാൾ മുറിയെടുത്ത ശേഷം ശനിയാഴ്ച പുറത്തുപോയിരുന്നു. ഇയാൾ തിരികെ വരാത്തതിനെ തുടർന്ന് ലോഡ്‌ജ് ജീവനക്കാർ നടത്തിയ പരിശോധനയിലാണ് മുറിയിലുണ്ടായിരുന്ന ടി.വി നഷ്ടപ്പെട്ടതായി മനസിലായത്. തുടർന്ന് ടെക്‌നീഷ്യൻ കാമറ ദൃശ്യങ്ങൾ പരിശോധിച്ചപ്പോഴാണ് താമസക്കാരനായ യുവാവ് ബിഗ് ഷോപ്പർ ബാഗിൽ ടി.വിയുമായി പോകുന്ന ദൃശ്യങ്ങൾ ലഭിച്ചത്. ദൃശ്യങ്ങളുടെ അടിസ്ഥാനത്തിൽ വെഞ്ഞാറമൂട് പൊലീസ് അന്വേഷണം ആരംഭിച്ചു.