ന്യൂഡൽഹി: ഇനി ഡൽഹി പെട്ടെന്നൊന്നും പിടിച്ചെടുക്കാൻ മറ്റാരേയും അനുവദിക്കില്ല.. തുടർവരവിൽ സാധാരണക്കാരുടെ മനസറിഞ്ഞ് അവരുടെ ആവശ്യങ്ങൾ നിറവേറ്റാനുള്ള തയാറെടുപ്പിലാണ് മുഖ്യമന്ത്രി അരവിന്ദ് കേജ് രിവാളും കൂട്ടരും. തിരഞ്ഞെടുപ്പ് വാഗ്ദാനമായി നൽകിയ 10 ഉറപ്പുകൾ (10 ഗാരന്റീസ്) പൂർണമായും നടപ്പാക്കിയാവും ഇതിന് തുടക്കം കുറിക്കുക. സത്യപ്രതിജ്ഞ കഴിഞ്ഞയുടൻ കൂടിയ മന്ത്രിസഭയിൽ കൈക്കൊണ്ട ആദ്യതീരുമാനം ഇവ നടപ്പാക്കാനുള്ള ആക്ഷൻ പ്ളാൻ കൈക്കൊള്ളലായിരുന്നു.

മന്ത്രിസഭയുടെ ആദ്യ നൂറുദിവസത്തിനുള്ളിൽ തന്നെ പ്ളാനിലുള്ള പദ്ധതികളുടെ ഗുണങ്ങൾ കിട്ടത്തക്ക വിധമായിരിക്കണം ആക്ഷൻ പ്ളാൻ തയാറാക്കേണ്ടതെന്നാണ് കേജ്‌രിവാളിന്റെ കർശന നിർദ്ദേശം. ഒരുകാരണവശാലും കാട്ടിക്കൂട്ടലാവുകയും അരുത്. ജനങ്ങളെ ഏറ്റവുംകൂടുതൽ ബാധിക്കുന്ന പ്രശ്നങ്ങൾക്കാണ് മുൻഗണന കൊടുക്കേണ്ടത്. ഇതിനൊപ്പം നേരത്തേ നടപ്പാക്കിയ പദ്ധതികൾ തുടരുകയും വേണം. അതിൽ ഒരുതരത്തിലുള്ള ഉപേക്ഷയും ഉണ്ടാവരുത്. പദ്ധതികൾ എന്തെങ്കിലും കാരണവശാൽ പാളുമെന്ന് തോന്നിയാൽ ബദൽ സംവിധാനം ഏർപ്പെടുത്തുകയും വേണം.

എതിരാളികളോട് വാക്കുകൊണ്ടുള്ള ഏറ്റുമുട്ടൽ ഒഴിവാക്കി പ്രവൃത്തിയിൽ മാത്രം കേന്ദ്രീകരിക്കുന്ന രീതി തിരഞ്ഞെടുപ്പിനുമുമ്പുതന്നെ കേജ്‌രിവാളും ടീമും നടപ്പാക്കിയിരുന്നു. അത് തുടരുമെന്നുതന്നെയാണ് അവർ നൽകുന്ന സൂചനയും. പുതിയ സർക്കാരിൽ വനിതകളെ ഉൾപ്പെടുത്താത്തിനെച്ചൊല്ലി ചിലകോണുകളിൽ നിന്ന് വിമർശനമുയർന്നെങ്കിലും ഉത്തരവാദിത്തപ്പെട്ട ആരും പ്രതികരിക്കാത്തതുതന്നെയാണ് ഇതിനുതെളിവ്. വിമർശിച്ചവരോട് പൊറുത്തിരിക്കുന്നു എന്നും ഡൽഹിയുടെ വികസനത്തിന് രാഷ്ട്രീയം നോക്കാതെ പ്രവൃത്തിക്കുമെന്നുമാണ് സത്യപ്രതിജ്ഞാവേളയിൽ കേജ്‌രിവാൾ പറഞ്ഞത്.

കേജ്‌രിവാളിന്റെ 10 ഉറപ്പുകൾ
1. 24 മണിക്കൂറും സൗജന്യമായി വൈദ്യുതി
2.പൈപ്പ് വഴി 24 മണിക്കൂറും വെള്ളം. സൗജന്യമായി മാസം 20,000 ലിറ്റർ വെള്ളം .
3. ഡൽഹിയിൽ ജനിക്കുന്ന കുട്ടികൾക്ക് ഡിഗ്രി വരെ സൗജന്യ വിദ്യാഭ്യാസം.
4. എല്ലാവർക്കും ആധുനിക സൗജന്യ ചികിത്സ
5. സൗജന്യ സുരക്ഷിത യാത്ര. ബസിൽ സ്ത്രീകൾക്ക് സൗജന്യം തുടരും. വിദ്യാർത്ഥികൾക്കും സൗജന്യമായി.
6. അഞ്ചു വർഷം കൊണ്ട് യമുന ശുദ്ധീകരിക്കും.
7. സ്ത്രീ സുരക്ഷയ്ക്കായി ഓരോ കവലയിലും സുരക്ഷാ ഉദ്യോഗസ്ഥർ. ഒപ്പം സി സി ടി വി കാമറകളും
8. ഡൽഹിയെ പച്ച പുതപ്പിക്കാൻ രണ്ട് കോടി മരങ്ങൾ.
9. ഡൽഹിയെ മാലിന്യ മുക്തമാക്കും.
10. തെരുവുകളിൽ കഴിയുന്ന സ്ത്രീകൾക്ക് വീട്