തിരുവനന്തപുരം: ജീരക സോഡയും ഇഞ്ചി സോഡയും തുടങ്ങി ഫുൾജാർ സോഡ വരെ എത്തി നിൽക്കുന്ന സോഡ കുടുംബത്തിൽ നിന്ന് ഒരു പുതിയ അതിഥി കൂടി -കാഷ്യൂ സോഡ. വേനൽ കനക്കുമ്പോൾ കുളിരേകാനായി സംസ്ഥാന സർക്കാരിന് കീഴിലുള്ള കശുമാവ് ഗവേഷണ കേന്ദ്രത്തിലാണ് കശുമാങ്ങ സോഡ വികസിപ്പിച്ചെടുത്തത്.

മറ്റേത് പഴങ്ങളെ പോലെയും പോഷക സമ്പന്നമാണ് കശുമാങ്ങയും. പക്ഷേ, കറയുള്ളതുകൊണ്ട് അധികം ആരും ഇത് കഴിക്കാറില്ല. എന്നാൽ കശുമാവ് ഗവേഷണ കേന്ദ്രത്തിൽ കശുമാങ്ങയുടെ കറ കളഞ്ഞാണ് സോഡ ഉത്പാദിപ്പിച്ചിരിക്കുന്നത്.

കശുമാങ്ങ സോഡ നിർമ്മിക്കാനുള്ള സാങ്കേതിക വിദ്യ കാർഷിക സർവകലാശാലയാണ് വികസിപ്പിച്ചെടുത്തത്. കശുമാങ്ങയുടെ വിളവെടുപ്പ് കാലം നവംബർ മുതൽ ഏപ്രിൽ വരെയാണെങ്കിലും വർഷം മുഴുവൻ സംഭരിച്ച് വ‌യ്ക്കാനുള്ള സാങ്കേതിക വിദ്യ ഇന്നുണ്ട്. അതിനാൽ മൂല്യവർദ്ധിത ഉത്പന്നങ്ങൾ ഉണ്ടാക്കാനും വിപണനം ചെയ്യാനും ആകുമെന്ന മേന്മയുമുണ്ട്. കശുമാങ്ങയുടെ നീരിലും പൾപ്പിലും മറ്റു പഴ ചാറുകളോ, പൾപ്പുകളോ ചേർത്ത് ഒട്ടേറെ രുചിഭേദങ്ങൾ തയ്യാറാക്കാനുള്ള തയാറെടുപ്പിലാണ് അധികൃതർ.

കശുമാങ്ങ സോഡ എങ്ങനെയുണ്ടാക്കാം ?

കശുമാങ്ങ ശേഖരിച്ച് കഴുകി വൃത്തിയാക്കി കൈകൊണ്ടോ മെഷീനിൽ പിഴിഞ്ഞോ പഴച്ചാർ ശേഖരിക്കുന്നു. ഇങ്ങനെ ശേഖരിച്ച പഴച്ചാറിൽ കഞ്ഞിവെള്ളം ഒഴിച്ചോ, ചവ്വരി കുറുക്കി ചേർത്തോ മാങ്ങയുടെ ചവർപ്പ് മാറ്റും. ഇതിനായി ഒരു കിലോ പഴച്ചാറിലേക്ക് 5 ഗ്രാം പൊടിച്ച ചവ്വരി കുറച്ച് വെള്ളത്തിൽ കുറുക്കി തണുപ്പിച്ച് ഒഴിച്ച് നന്നായി ഇളക്കും. ചവർപ്പിന് കാരണമായ ടാനിൻ താഴെ അടിഞ്ഞു കൂടും. തെളിഞ്ഞ നിറമില്ലാത്ത നീര് മുകളിൽ നിന്നും ഊറ്റിയെടുക്കും. ഇതിൽ ആവശ്യമായ പ്രിസർവേറ്റീവ്സ് ചേർത്ത് ഏറെകാലം സൂക്ഷിച്ചുവയ്ക്കാം. ഈ തെളിഞ്ഞ നീരിൽ ഇരട്ടി അളവിൽ പഞ്ചസാര ചേർത്ത് സിറപ്പാക്കി മാറ്റും. ഈ സിറപ്പ് ഒരു വർഷം വരെ കേടു കൂടാതെ ഇരിക്കും. ഈ സിറപ്പിൽ കാർബണേറ്റഡ് വെള്ളം ചേർത്താൽ രുചിയുള്ള കശുമാങ്ങ സോഡയാകും.

ലക്ഷ്യം വൈവിധ്യവത്കരണം

കശുഅണ്ടി വികസന കോർപ്പറേഷന്റെ ഉത്പന്നങ്ങളുടെ വൈവിദ്ധ്യവത്കരണത്തിന്റെ ഭാഗമായി രണ്ട് വർഷം മുമ്പാണ് കശുമാങ്ങ സോഡ എന്ന ആശയം ഉരുതിരിഞ്ഞത്. അന്ന് ഫെനി മദ്യം നിർമിക്കാനുള്ള പദ്ധതി സർക്കാരിന്റെ അനുമതിക്കായി സമർപ്പിക്കാൻ നീക്കം നടത്തിയെങ്കിലും വിജയിച്ചില്ല.