ആലപ്പുഴ: പ്രകൃതിയോട് ഇണങ്ങി ജീവിക്കാൻ പ്രേരിപ്പിച്ച് മാവേലിക്കര ബ്ലോക്കിൽ 'മിയാ വാക്കി ' പദ്ധതി. മരക്കാടുകൾ വെച്ചുപിടിപ്പിക്കുന്ന പ്രവർത്തനങ്ങൾക്കാണ് പദ്ധതിയിൽ തുടക്കമാകുക. അന്തർദേശിയ തലത്തിൽ പ്രവർത്തിക്കുന്ന സംഘടനയായ ഫോക്ക്‌ലാൻഡിന്റെ സഹായത്തോടെയാണ് പദ്ധതിക്ക് ബ്ലോക്ക് പഞ്ചായത്ത് രൂപം നൽകിയത്. ഫോക് ലാൻഡിന്റെ , തദ്ദേശ സ്വയംഭരണ സ്ഥാപനങ്ങളുമായി ചേർന്നുള്ള ആദ്യ പദ്ധതിയാണ് മാവേലിക്കര ബ്ലോക്കിലേത്. ബ്ലോക്ക് പഞ്ചായത്തിനോട് ചേർന്നുള്ള രണ്ട് സെന്റ് സ്ഥലമാണ് മരക്കാടുകൾ വെച്ചുപിടിപ്പിക്കാനായി ഭരണസമിതി വിട്ടുനൽകിയത്. മരക്കാടുകൾക്ക് ഇടയിൽ മനോഹരമായ ഇരിപ്പിടങ്ങളടക്കം സജ്ജീകരിച്ചിക്കൊണ്ടാണ് പദ്ധതി നടപ്പാക്കുകയെന്ന് ബ്ലോക്ക് പഞ്ചായത്ത് പ്രസിഡന്റ് ആർ. രഘുപ്രസാദ് പറഞ്ഞു. പ്രശസ്തനായ ജാപ്പനീസ് പ്രകൃതി സ്നേഹിയും സസ്യശാസ്ത്ര ഗവേഷകനുമായ അക്കിര മിയാവാക്കി തന്റെ ഗവേഷണങ്ങളിലൂടെ രൂപകൽപ്പന ചെയ്തെടുത്ത സസ്യങ്ങളുടെയും മരങ്ങളുടെയും കൂട്ടായ നടീൽ രീതി ആയതുകൊണ്ടാണ് ഈ പച്ചത്തുരുത്തുകളുടെ നിർമ്മാണത്തിന് മിയാ വാക്കി എന്ന പേര് നൽകിയത്. ഫോക്ലാൻഡ് കാസർഗോഡ് സെന്ററിലെ ഉദ്യോഗസ്ഥനായ ഡോ.വിജയ് രാജാണ് പദ്ധതിക്ക് വേണ്ട നിർദ്ദേശങ്ങൾ നൽകുന്നത്. 400 മരങ്ങളാണ് മാവേലിക്കര ബ്ലോക്ക് ഓഫീസിനോട് ചേർന്നുള്ള 2 സെന്റ് സ്ഥലത്ത് നടുന്നത്.