ആലപ്പുഴ : ചുനക്കരയിൽ ജൈവ പച്ചക്കറി തോട്ടമൊരുക്കാൻ ഒരുങ്ങുകയാണ് ഒരു കൂട്ടം വനിതകൾ. ചുനക്കര ഗ്രാമ പഞ്ചായത്ത് എം.കെ.എസ്.പി ലേബർ ഗ്രൂപ്പിലെ അഗങ്ങളൊരുക്കുന്ന തോട്ടത്തിലെ വിത്തിടീൽ ഉദ്ഘാടനം പഞ്ചായത്ത് വൈസ് പ്രസിഡന്റ് സുരേഷ് പുലരി നിർവഹിച്ചു.

പഞ്ചായത്ത് സ്ഥിരം സമിതി അദ്ധ്യക്ഷ സബീന റഹീം വാർഡ് മെമ്പർമാരായ കെ.ജി.ഗോപകുമാർ , വി.ആർ.രാജേഷ്,സവിതാ സുധി ,മാജിത സാദിക്, ഷറഫുദ്ദിൻ എന്നിവർ പങ്കെടുത്തു.

പഞ്ചായത്തിന്റെ വിവിധ പ്രാദേശങ്ങളിൽ നിന്നുള്ള 10 സ്ത്രീകൾ അംഗങ്ങളാണ് ഗ്രൂപ്പിൽ ഉള്ളത്. ഗീത സുരേന്ദ്രനാണ് ഗ്രൂപ്പ് ലീഡർ. 10 സെന്റ് സ്ഥലത്ത് അത്യുല്പാദന ശേഷിയുള്ള ആയിരം വെണ്ട വിത്തുകൾ നട്ട് ഡ്രിപ് ഇറിഗേഷനോട് കൂടിയുളള കൃഷി രീതിയാണ് നടപ്പാക്കുന്നത്. ചെലവുകൾ എം.കെ.എസ്.പി ഫെഡറേഷനാണ് വഹിക്കുക. വിളവ് ഗ്രൂപ്പ് അംഗങ്ങൾക്ക് എടുക്കാം. ഗ്രൂപ്പ് അംഗങ്ങൾക്ക് നാലു ദിവസത്തെ പരിശീലനം ഫെഡറേഷൻ നൽകിയിരുന്നതായി എം.കെ.എസ്.പി ആലപ്പുഴ സൗത്ത് ഫെഡറേഷൻ കോ ഓർഡിനേറ്റർ സുമിത ശിവരാജനും സെക്രട്ടറി സുമംഗലയും അറിയിച്ചു.