കായംകുളം: വീട്ടുകാർ ആശുപത്രിയിൽ പോയ തക്കം നോക്കി വീട് കുത്തിത്തുറന്ന് കവർച്ച നടത്തിയ മോഷ്ടാക്കൾ 15 പവന്റെ സ്വർണാഭരണങ്ങളും പണവും കവർന്നു. കായംകുളം കൃഷ്ണപുരം കാപ്പിൽ കിഴക്ക് ശ്രീശൈലത്തിൽ (വൈര വന വടക്കേതിൽ ) പ്രവാസിയായ ശിവദാസന്റെ വീട്ടിലാണ് മോഷണം നടന്നത്. വീടിന്റെ മുൻ വശത്തെ കതക് കുത്തിത്തുറന്ന് അകത്തുകയറി അലമാരയുടെ പൂട്ട് തകർത്ത് സ്വർണവും പണവും അപഹരിക്കുകയായിരുന്നു.

ശിവദാസൻ വിദേശത്താണ്. ഭാര്യ രാജലക്ഷ്മി സുഖമില്ലാതെ ആശുപത്രിയിലായ അച്ഛനെ കാണാൻ മകനുമായി പോയിരിക്കുകയായിരുന്നു. ഇന്നലെ ഉച്ചയ്ക്ക് 12 ഓടെ ഇവർ വീട്ടിലെത്തിയപ്പോഴാണ് മുൻ വശത്തെ കതക് കുത്തിത്തുറന്ന നിലയിൽ കണ്ടെത്തിയത്. വിവരമറിയിച്ചതിനെ തുടർന്ന് കായംകുളം പൊലീസ് സ്ഥലത്തെത്തി പരിശോധന നടത്തി .ഫോറൻസിക് വിഭാഗവും ഡോഗ് സ്‌ക്വാഡും തെളിവെടുപ്പ് നടത്തി.