അമ്പലപ്പുഴ: സുഹൃത്തിന്റെ ബന്ധുവിന്റെ വിവാഹ ചടങ്ങിനിടെ സ്വകാര്യ ഇൻഷ്വറൻസ് കമ്പനി മാനേജർ കുഴഞ്ഞു വീണ് മരിച്ചു. തിരുവല്ല പുളിക്കീഴ് വളഞ്ഞവട്ടം ജോജോ വില്ലയിൽ ജോജോ ചാക്കോയാണ് (50) മരിച്ചത്. അമ്പലപ്പുഴയിലെ കല്ല്യാണ മണ്ഡപത്തിൽ ഇന്നലെ ഉച്ചയ്ക്കു ശേഷമായിരുന്നു സംഭവം.

കോണിപ്പടി കയറുന്നതിനിടെയാണ് ജോജോ കുഴഞ്ഞുവീണത്. ഉടൻതന്നെ ആലപ്പുഴ മെഡി. ആശുപത്രിയിൽ എത്തിച്ചെങ്കിലും രക്ഷിക്കാനായില്ല. മൃതദേഹം മോർച്ചറിയിലേക്കു മാറ്റി. ആദിത്യ ബിർള കമ്പനിയുടെ മാവേലിക്കര ഓഫീസ് മാനേജരായിരുന്നു ജോജോ.

കൊറോണ പശ്ചാത്തലത്തിലുള്ള സർക്കാർ ഉത്തരവ് കാറ്റിൽപ്പറത്തിയാണ് വിവാഹം നടത്തിയതെന്ന് ആക്ഷേപമുണ്ട്. പൊലീസ് ഉദ്യോഗസ്ഥരടക്കം 150 ഓളം പേർ വിവാഹത്തിൽ പങ്കെടുത്തു. അമ്പലപ്പുഴ സ്വദേശിയായ യുവതിയും തിരുവനന്തപുരം സ്വദേശിയും തമ്മിലായിരുന്നു വിവാഹം. വിവാഹത്തിൽ 50ൽ അധികം ആളുകളെ പങ്കെടുപ്പിക്കരുതെന്നു കാട്ടി പഞ്ചായത്തും ആരോഗ്യ വകുപ്പും പൊലീസും വിവാഹ നടത്തിപ്പുകാർക്കും ആഡിറ്റോറിയം ഉടമയ്ക്കും ദിവസങ്ങൾക്കു മുൻപു തന്നെ രേഖാമൂലം നിർദേശം നൽകിയിരുന്നു. ഇത് കൂട്ടാക്കാതെയാണ് ചടങ്ങ് നടത്തിയത്. ആഡിറ്റോറിയം അധികൃതർക്ക് പൊലീസ് താക്കീത് നൽകി. ജോജോ ചാക്കോയുടെ മരണത്തിൽ അസ്വാഭാവിക മരണത്തിന് അമ്പലപ്പുഴ പൊലീസ് കേസെടുത്തു.