ആലപ്പുഴ: സാനിട്ടൈസറിന് വിപണിയിൽ ഉള്ള ലഭ്യതക്കുറവ് പരിഗണിച്ച് ജില്ലാജയിലിൽ 'ഫ്രീഡം സാനിട്ടൈസർ' നിർമ്മാണം തുടങ്ങി. കളർകോഡ് എസ്.ഡി കോളേജിലെ രസതന്ത്ര വിഭാഗം മേധാവിയുടെ മേൽനോട്ടത്തിൽ ജയിൽ ജീവനക്കാരും അന്തേവാസികളും ചേർന്നാണ് ഗുണനിലവാരമുള്ള സാനിട്ടൈസർ നിർമ്മിക്കുന്നത്. എസ്.ഡി.കോളജ് രസതന്ത്ര വിഭാഗം മേധാവി ഡോ.ബി.ഉഷാകുമാരി, ജലവിഭവ ഗവേഷണ കേന്ദ്രം മുഖ്യ ഗവേഷകൻ ഡോ.ജി.നാഗേന്ദ്ര പ്രഭു, ഡോ.പി.എസ്.പരമേശ്വരൻ, ഡോ.കെ.എച്ച്.പ്രേമ, ഷൈൻ ആർ.ചന്ദ്രൻ, ലാബ് ജീവനക്കാരൻ ബാബു തുടങ്ങിയവരാണ് തടവുകാർക്ക് പരിശീലനം നൽകിയത്

100 എം എൽ സാനിട്ടൈസറിന് 50 രൂപയാണ് വില . സ്റ്റേറ്റ് ലീഗൽ സർവീസ് അതോറിട്ടിയിൽ നിന്ന് ഇപ്പോൾ തന്നെ സാനിട്ടൈസർ ആവശ്യപ്പെട്ടിട്ടുണ്ടെന്ന് ജില്ല ജയിൽ സൂപ്രണ്ട് ആർ.സാജൻ പറഞ്ഞു. കഴുകി അണുവിമുക്തമാക്കി വീണ്ടും ഉപയോഗിക്കാവുന്ന മാസ്‌കും ജയിലിലെ അന്തേവാസികൾ നിർമ്മിക്കുന്നുണ്ട്. ഒരു മാസ്‌കിന് 10 രൂപയാണ് വില.