ആലപ്പുഴ:അശരണർക്കും നാടിനു മൊത്തത്തിലും ആശ്രയമായി മാറുകയാണ് അമ്പലപ്പുഴ കെ.കെ. കുഞ്ചുപിള്ള സ്‌കൂളിൽ ആരംഭിച്ച കമ്മ്യൂണി​റ്റി കിച്ചൺ. അമ്പലപ്പുഴ തെക്ക് ഗ്രാമപഞ്ചായത്തിന് കീഴിൽ ആരംഭിച്ച കമ്മ്യൂണി​റ്റി കിച്ചൺ വഴി പ്രതിദിനം120 ഓളം ആളുകൾക്കാണ് ഭക്ഷണം നൽകുന്നത്.
മുപ്പതിനടുത്ത് അതിഥി തൊഴിലാളികൾക്കും ദിവസേന ഇവിടെ നിന്നു ഭക്ഷണം നൽകുന്നുണ്ട്. പാലക്കാട് കൊഴിഞ്ഞംപാറ സ്വദേശികളായ രണ്ടു കുടുംബങ്ങളിലെ നാല് വയസുകാരൻ ഉൾപ്പെടെ 13 പേർ കൊട്ട നെയ്യാനായി അമ്പലപ്പുഴയിൽ തെരുവോരത്ത് കഴിയവേയാണ് ലോക്ക് ഡൗൺ പ്രഖ്യാപിച്ചത്. നാട്ടിലേക്ക് പോകാൻ പ​റ്റാത്ത അവസ്ഥയിൽ ഇനി എന്ത് എന്ന ചിന്തയിലായിരുന്നു അവർ.

പഞ്ചായത്തിന്റെ നേതൃത്വത്തിൽ സ്‌കൂളിൽ താമസവും ഭക്ഷണവും നൽകിയാണ് ഇവരെ സംരക്ഷിച്ചത്. ഇവരെക്കൂടാതെ ഭിക്ഷാടനത്തിനും മ​റ്റുമായി തമിഴ്നാട്ടിൽ നിന്നെത്തിയവർ ഉൾപ്പെടെ 28 പേർക്കും സ്‌കൂളിൽ താമസ സൗകര്യം ഒരുക്കിയിട്ടുണ്ട്. ഇവരിൽ നാല് കുട്ടികളും ഉൾപ്പെടും. വീടുകളിൽ കരുതൽ നിരീക്ഷണത്തിലുള്ളവർ, ലോക്ക്ഡൗൺ കാരണം ഭക്ഷണം ലഭിക്കാതെ ഒ​റ്റപ്പെട്ട് കഴിയുന്നവർ, ഒ​റ്റപ്പെട്ട് കഴിയുന്ന പ്രായമായവർ, അതിഥി തൊഴിലാളികൾ, ക്യാമ്പിലുള്ളവർ തുടങ്ങി 126 പേർക്കാണ് കമ്മ്യൂണി​റ്റി കിച്ചണിലൂടെ ഉച്ചഭക്ഷണം നൽകിയത്. ജനകീയ ഭക്ഷണ ശാലയായ പാഥേയത്തിലൂടെ 20 രൂപ നിരക്കിൽ 152 പേർക്കും ഭക്ഷണം നൽകി. പഞ്ചായത്ത് പ്രസിഡന്റ് ജി. വേണു ലാലിന്റെ നേതൃത്വത്തിൽ പഞ്ചായത്തിലെ വിവിധ പ്രദേശങ്ങളിലെ തെരുവ് നായ്ക്കൾക്ക് ഭക്ഷണം നൽകുന്നുണ്ട്. പഞ്ചായത്ത് പ്രസിഡന്റ് ജി.വേണുലാൽ, വൈസ് പ്രസിഡന്റ് ശ്രീജ രതീഷ്, സ്​റ്റാൻഡിംഗ് കമ്മി​റ്റി ചെയർപേഴ്സൺമാരായ രതിയമ്മ, ആർ. ശ്രീകുമാർ, മെമ്പർ ജിത്തു കൃഷ്ണൻ, ബ്ലോക്ക് പഞ്ചായത്ത് അംഗം പ്രജിത് കാരിക്കൽ, വോളണ്ടിയർമാരായ ശ്രീലാൽ, ഫ്രമിൽ, മിഥുൻ, അനു, പ്രമോദ്, ജീവൻ എന്നിവരാണ് കമ്മ്യൂണി​റ്റി കിച്ചണ് നേതൃത്വം നൽകുന്നത്.