ന്യൂഡൽഹി :വനിതാ ദിനത്തിൽ തന്റെ സാമൂഹിക മാദ്ധ്യമ അക്കൗണ്ട് ചുമതല വനിതകളെ ഏൽപ്പിക്കുമെന്ന് പ്രധാനമന്ത്രി അറിയിച്ചതിന് പിന്നാലെ സ്ത്രീകൾക്ക് സമ്മാനവുമായി ഇന്ത്യൻ പുരാവസ്തു വിഭാഗവും (എ.എസ്.ഐ). ഇന്ന് (മാർച്ച് 8) പുരാവസ്തു വിഭാഗത്തിന്റെ മേൽനോട്ടത്തിലുള്ള രാജ്യത്തെ എല്ലാ ചരിത്ര സ്മാരകങ്ങളിലും വനിതകൾക്ക് പ്രവേശനം സൗജന്യമായിരിക്കുമെന്ന് മന്ത്രാലയം വ്യക്തമാക്കി. വലിയ തുടക്കമാണിതെന്ന് സാംസ്‌കാരിക മന്ത്രി പ്രഹ്ലാദ് പട്ടേൽ പറഞ്ഞു. അന്താരാഷ്ട്ര വനിതാ ദിനാചരണത്തിന് മുമ്പേ നമ്മുടെ രാജ്യം സ്ത്രീകളെ ആരാധിച്ചിരുന്നുവെന്നും പുരാതന കാലം മുതൽ സ്ത്രീകളെ ദൈവതുല്യമായി കണ്ട സംസ്‌കാരമാണ് നമ്മുടെത്. മുമ്പ് എല്ലാ ചരിത്ര സ്മാരകങ്ങളിലും കുട്ടികളെ മുലയൂട്ടാനുള്ള സൗകര്യം ഏർപ്പെടുത്തുമെന്ന് മന്ത്രി പ്രഖ്യാപിച്ചിരുന്നു.