കോലഞ്ചേരി: വേനലിൽ കുളിരേകാൻ രുചിയാർന്ന കശുമാങ്ങ സോഡയും വിപണിയിലെത്തി. തൃശൂർ മടക്കത്തറയിലുള്ള കശുമാവ് ഗവേഷണ കേന്ദ്രമാണ് ഈ സോഡ കണ്ടുപിടിച്ചത് . മ​റ്റേത് പഴങ്ങളെ പോലെയും പോഷക സമ്പന്നമാണ് കശുമാങ്ങ. പക്ഷെ കറയുള്ളത് കൊണ്ട് ആരും അധികം ഇത് കഴിക്കാറില്ല. എന്നാൽ മടക്കത്തറ കാശുമാവ് ഗവേഷണ കേന്ദ്രത്തിൽ കശുമാങ്ങയുടെ കറ കളഞ്ഞ് അതിൽ നിന്നും വളരെ രുചിയേറിയ ഒട്ടേറെ വിഭവങ്ങൾ തയ്യാറാക്കുന്നുണ്ട്.

ഇതിനുള്ള സാങ്കേതിക വിദ്യ കാർഷിക സർവകലാശാല വികസിപ്പിച്ചെടുത്തിട്ടുണ്ട്. കശുമാങ്ങയുടെ വിളവെടുപ്പ് കാലം നവംബർ മുതൽ ഏപ്രിൽ വരെയാണെങ്കിലും വർഷം മുഴുവൻ സംഭരിച്ചു വെക്കാനുള്ള സാങ്കേതിക വിദ്യ ഇന്നുണ്ട്. അതിനാൽ മൂല്യവർധിത ഉത് പ്പന്നങ്ങൾ ഉണ്ടാക്കാനും വിപണനം ചെയ്യാനും കഴിയും .

കശുമാങ്ങയുടെ നീരിലും പൾപ്പിലും മ​റ്റു പഴ ചാറുകളോ, പൾപ്പുകളോ ചേർത്ത് ഒട്ടേറെ രുചിഭേദങ്ങൾ തയ്യാറാക്കാം. ഈ ഗവേഷണ കേന്ദ്രത്തിൽ കശുമാങ്ങ ഉൽപ്പന്നങ്ങൾ തയ്യാറാക്കുന്നതിനുള്ള പരിശീലനം വ്യക്തികൾക്കും സംരംഭകർക്കും നൽകും.

ഡോ ജലജ എസ് മേനോൻ

ഉണ്ടാക്കാം , ഇങ്ങനെ...

കശുമാങ്ങ ശേഖരിച്ച് കഴുകി വൃത്തിയാക്കി മെഷീനിൽ പിഴിഞ്ഞ് പഴച്ചാർ ശേഖരിക്കും. പഴച്ചാറിൽ കഞ്ഞിവെള്ളം ഒഴിച്ചോ, ചവ്വരി കുറുക്കി ചേർത്തോ മാങ്ങയുടെ ചവർപ്പ് മാ​റ്റും. ഒരുകിലോ പഴച്ചാറിലേക്ക് 5 ഗ്രാം പൊടിച്ച ചവ്വരി കുറച്ച് വെള്ളത്തിൽ കുറുക്കി തണുപ്പിച്ച് ഒഴിച്ച് നന്നായി ഇളക്കും ചവർപ്പിന് കാരണമായ ടാനിൻ താഴെ അടിഞ്ഞു കൂടും. തെളിഞ്ഞ നിറമില്ലാത്ത നീര് മുകളിൽ നിന്നും ഊ​റ്റിയെടുക്കും. ഇതിൽ ആവശ്യമായ പ്രിസർവേ​റ്റീവ്‌സ് ചേർത്താൽ ഏറെകാലം സൂക്ഷിച്ചുവയ്ക്കാം. ഈ തെളിഞ്ഞ നീരിൽ ഇരട്ടി അളവിൽ പഞ്ചസാര ചേർത്ത് സിറപ്പാക്കി മാ​റ്റും. ഈ സിറപ്പ് ഒരു വർഷം വരെ കേടു കൂടാതെ ഇരിക്കും. ഈ സിറപ്പിൽ കാർബണേ​റ്റഡ് വെള്ളം ചേർത്താൽ രുചിയുള്ള കശുമാങ്ങ സോഡറെഡി.