മൂവാറ്റുപുഴ: ഗ്രന്ഥശാല സംഘം പ്ലാറ്റിനം ജൂബിലി ആഘോഷത്തിന്റെ ഭാഗമായി മൂവാറ്റുപുഴ താലൂക്ക് ലെെബ്രറി കൗൺസിൽ സംഘടിപ്പിക്കുന്ന ആഘോഷ പരിപാടികളുടെ ഉദ്ഘാടനം നിർമ്മല ഹയർ സെക്കൻഡറി സ്കൂൾ ഓഡിറ്റോറിയത്തിൽ ഇന്ന് രാവിലെ 9.30 ന് ജില്ലാ പഞ്ചായത്ത് പ്രസിഡന്റ് ഡോളി കുര്യാക്കോസ് നിർവഹിക്കും. താലൂക്ക് പ്രസിഡന്റ് ജോസ് കരിമ്പന അദ്ധ്യക്ഷത വഹിക്കും. ബ്ലോക്ക് പഞ്ചായത്ത് പ്രസിഡന്റ് മാരായ ലിസി ജോളി, സുമിതി സുരേന്ദ്രൻ, നിർമ്മല എച്ച്.എസ്. എസ് പ്രിൻസിപ്പൽ റവ.ഡോ.ആന്റണി പുത്തൻകുളം എന്നിവർ സംസാരിക്കും. തുടർന്ന് 10.30ന് ഗ്രന്ഥശാല പ്രസ്ഥാനം പിന്നിട്ട 75 വർഷങ്ങളെകുറിച്ച് കേരള സ്റ്റേറ്റ് ലെെബ്രറി കൗൺസിൽ പ്രസിഡന്റ് ഡോ. കെ.വി. കുഞ്ഞി കൃഷ്ണൻ പ്രഭാഷണം നടത്തും.11.30 ന് ആരംഭിക്കുന്ന ഗ്രന്ഥശാല പ്രവർത്തകസംഗമത്തിൽ ജില്ലാ ലെെബ്രറി കൗൺസിൽ സെക്രട്ടറി എം.ആർ. സുരേന്ദ്രൻ ഗ്രന്ഥശാലകളും സാമൂഹ്യവികാസവും രേഖ അവതരിപ്പിക്കും. സ്റ്റേറ്റ് ലെെബ്രറി കൗൺസിൽ അംഗം ജോഷിസ്കറിയ അദ്ധ്യക്ഷത വഹിക്കും. വെെകിട്ട് 3.30 ന് നടക്കുന്ന സമാപന സമ്മേളനത്തിൽ ഡോ. എം.പി. മത്തായി പ്രഭാഷണം നടത്തും. ഇതോടൊപ്പം മഹാത്മജിയുടെ 150-ാം ജന്മവാർഷികം പ്രമാണിച്ച് താലൂക്കിലെ 40 മുതിർന്ന ഗ്രന്ഥശാല പ്രവർത്തകർക്ക് ഖാദി വസ്ത്രം നൽകി മുൻ എം.എൽ.എ ഗോപി കോട്ടമുറിക്കൽ ആദരിക്കും. കെ. പി. രാമചന്ദ്രൻ അദ്ധ്യക്ഷത വഹിക്കും. സതി രമേശ്, പി.കെ. വിജയൻ, പി. അർജ്ജുനൻ എന്നിവർ സംസാരിക്കും. തുടർന്ന് ആരംഭിക്കുന്ന അക്ഷരഘോഷയാത്ര നഗരസഭ അദ്ധ്യക്ഷ ഉഷശശിധരൻ ഫ്ലാഗ് ഓഫ് ചെയ്യും. അക്ഷര ഘോഷയാത്ര നഗരം ചുറ്റി നെഹ്റു പ്രതിമയുടെ മുന്നിൽ സമാപിക്കും.കേരളത്തിൽ സംഘടിത ഗ്രന്ഥശാല പ്രസ്ഥാനം രൂപം കൊണ്ടിട്ട് ഏഴര പതിറ്റാണ്ട് പൂർത്തിയാകുകയാണ്.