ചെമ്പറക്കി: എറണാകുളം റൂറൽ ജില്ലാ പൊലീസ് സ്‌പോർട്ട്‌സ് ആന്റ് അത്‌ലറ്റിക്‌സ് മീറ്റിന് ചെമ്പറക്കിയൽ തുടക്കമായി. ചെമ്പറക്കിയിലെ ബീസ് ഗ്രൗണ്ടിൽ നടന്ന ക്രിക്കറ്റ് മത്സരം ജില്ലാ പൊലീസ് മേധാവി കെ.കാർത്തിക് ഉദ്ഘാടനം ചെയ്തു. ജില്ലയിലെ മൂന്ന് പൊലീസ് സബ്ബ് ഡിവിഷനുകളെയും,ജില്ലാ ഹെഡ് ക്വാർട്ടറിനെയും നാല് ടീമുകളായി തിരിച്ചാണ് മത്സരങ്ങൾ നടത്തുന്നത്. ഇന്നലെ നടന്ന ക്രിക്കറ്റ് മത്സരത്തിൽ പെരുമ്പാവൂർ സബ്ബ് ഡിവിഷനെ പരാജയപ്പെടുത്തി ജില്ലാ ഹെഡ് ക്വാർട്ടർ ടീം ജേതാക്കളായി. വരും ദിവസങ്ങളിൽ ഫുട്‌ബോൾ, ഷട്ടിൽ ബാഡ്മിന്റൻ, വോളിബോൾ എന്നിവയും മറ്റ് അത്‌ലറ്റിക്‌സ് മത്സരങ്ങളും നടക്കും.