# ഖൗലത്തിനോട് അയ്യനാട് സഹകരണ ബാങ്ക് ഡയറക്ടർ സ്ഥാനം ഒഴിയാൻ പാർട്ടി ആവശ്യപ്പെട്ടു

തൃക്കാക്കര : പ്രളയദുരിതാശ്വാസ ഫണ്ട് തട്ടിയെടുത്ത സംഭവത്തിൽ അയ്യനാട് സഹകരണ ബാങ്ക് ഡയറക്ടർ ബോർഡംഗവും കേസിലെ പ്രതിയുമായ സി.പി.എം നേതാവ് എം.എൻ. അൻവറിന്റെ ഭാര്യ ഖൗലത്ത്, അറസ്റ്റിലായ മഹേഷിന്റെ ഭാര്യ നീതു എന്നിവരെ കൂടി വിജിലൻസ് പ്രതി ചേർത്തു. ഖൗലത്തിനോട് ബാങ്ക് ഡയറക്ടർ ബോർഡ് അംഗത്വം രാജിവയ്ക്കാൻ സി.പി.എം ആവശ്യപ്പെട്ടു.

അയ്യനാട് ബാങ്കി​ലൂടെയാണ് പ്രളയഫണ്ടി​ൽ നി​ന്നുള്ള 10.54 ലക്ഷം രൂപ കൈമാറി​യത്. ആരുടേതെന്ന് പറയാതെ ബാങ്കി​ന്റെ ഫെഡറൽ ബാങ്ക് അക്കൗണ്ടി​ലേക്ക് വന്ന തുക അൻവർ ആവശ്യപ്പെട്ടതനുസരി​ച്ച് ഇയാളുടെ അക്കൗണ്ടി​ലേക്ക് നൽകുകയായി​രുന്നു.

അൻവറി​നും ഭാര്യ ഖൗലത്തി​നും അയ്യനാട് ബാങ്കി​ൽ ജോയി​ന്റ് അക്കൗണ്ടാണുള്ളത്. അതുകൊണ്ടാണ് ഇവരെയും പ്രതി​യാക്കി​യത്.

ഈ അക്കൗണ്ടി​ൽ നി​ന്ന് മഹേഷി​ന്റെ ഭാര്യ നീതുവി​ന്റെ അക്കൗണ്ടി​ലേക്ക് പണം മാറ്റി​യതി​നാൽ അവരും പ്രതി​യായി​.

മഹേഷ് പൊലീസിന് കൊടുത്ത മൊഴിയിൽ നിധി​നും ഭാര്യക്കും കേസി​ൽ പങ്കില്ലെന്നും വിഷ്ണു പ്രസാദിന്റെ നിർദേശത്തെത്തുടർന്നാണ് തന്റെ സുഹൃത്തുക്കളായ ഇവരുടെയും അൻവറി​ന്റെയും അക്കൗണ്ടി​ലേക്ക് തുക മാറ്റി​യതെന്നും മൊഴി​യി​ലുണ്ട്. ഇരുവരെയും മാപ്പ് സാക്ഷിയാക്കാനൊരുങ്ങുകയാണ് അന്വേഷണ സംഘം.

നിധിൻ (30), ഭാര്യ ഷിന്റു(27), രണ്ടാം പ്രതിയും സൂത്രധാരനുമായ മഹേഷ് എന്നിവരെ മൂവാറ്റുപുഴ വിജിലൻസ് കോടതി ഈ മാസം 17 വരെ റിമാൻഡു ചെയ്തു. ഷിന്റുവിനെ കാക്കനാട് വനിതാ ജയിലിലേക്കും മറ്റ് രണ്ട് പേരെയും മൂവാറ്റുപുഴ സബ് ജയിലിലേക്കുമാണ് മാറ്റിയത്.ഇവരുടെ ജാമ്യാപേക്ഷ ശനിയാഴ്ച കോടതി പരിഗണിക്കുന്നുണ്ട്.

കേസിൽ ഇപ്പോൾ ഏഴ് പ്രതികൾ

1. എറണാകുളം കളക്ടറേറ്റി​ലെ സെക്ഷൻ ക്ലാർക്ക് വിഷ്ണുപ്രസാദ്

2. വി​ഷ്ണുവി​ന്റെ സുഹൃത്തും സൂത്രധാരനുമായ ബി​. മഹേഷ്

3. സി​.പി​.എം നേതാവ് എം.എം അൻവർ

4. അൻവറി​ന്റെ ഭാര്യ അയ്യനാട് ബാങ്ക് ഡയറക്ടറുമായ ഖൗലത്ത്

5. മഹേഷിന്റെ ഭാര്യ നീതു

6. സി.പി.എം നേതാവ് എൻ.എൻ നിധിൻ

7. നി​ധി​ന്റെ ഭാര്യ ഷിന്റു