കോലഞ്ചേരി: വേനൽ കടുത്തതോടെ സംസ്ഥാനത്തെ ക്ഷീരകർഷകർ പ്രതിസന്ധിയിൽ. പാൽ ഉൽപാദനത്തിൽ ഇടിവ് വന്നതിനൊപ്പം കാലിത്തീ​റ്റ, വൈക്കോൽ എന്നിവയുടെ വിലവർദ്ധനയും പച്ചപ്പുല്ല് കിട്ടാനില്ലാത്തതുമാണ് കർഷകരെ കുഴക്കിയത്.

കഴിഞ്ഞവർഷം കാലിത്തീ​റ്റയ്ക്ക് ചാക്കൊന്നിന് 1,030 രൂപയും ഒരു കെട്ട് വൈക്കോലിന് 8 രൂപയുമായിരുന്നു വില. ഇപ്പോൾ കാലിത്തീ​റ്റയ്ക്ക് 1,450 രൂപയാണ് നൽകേണ്ടത്. വൈക്കോലിനാകട്ടെ 11 രൂപയും. 20 ലി​റ്റർ പാൽ ലഭിക്കുന്ന പശുവിന് 270 രൂപ ഒരുദിവസം ചെലവ് വരുന്നു. അന്തരീക്ഷ ഊഷ്മാവിലുണ്ടായ വർധനമൂലം 10 ലീ​റ്റർ പാൽ ദിവസേന നൽകിയിരുന്ന പശുവിൽനിന്ന് ഇപ്പോൾ കിട്ടുന്നത് 7 ലീ​റ്റർ മാത്രമാണ്. അസംസ്‌കൃത വസ്തുക്കളുടെ വില കുറഞ്ഞിട്ടും കാലിത്തീ​റ്റയുടെ വില കുറയാത്തതാണ് കർഷകരെ വലയ്ക്കുന്നത്. ക്ഷീരകർഷകന് കാലിത്തീ​റ്റയും പുല്ലും മ​റ്റും സർക്കാർ സബ്‌സിഡി നിരക്കിൽ നൽകിയാൽ മാത്രമേ പ്രശ്‌നം പരിഹരിക്കാൻ കഴിയൂ എന്നാണ് ക്ഷീര കർഷകർ പറയുന്നത്. പച്ചപ്പുല്ലിന്റെ ലഭ്യതക്കുറവ് പാൽ ഉൽപാദനത്തെ ബാധിച്ചതായി കർഷകർ പറയുന്നു. അതോടൊപ്പം ജലക്ഷാമംകൂടി വന്നതോടെ പരിപാലനവും ഏറെ ദുഷ്‌കരമായി.

കാലിത്തീ​റ്റ ചാക്കൊന്നിന് 1,030 രൂപ ഇപ്പോൾ 1,450 രൂപ

ഒരു കെട്ട് വൈക്കോലിന് 8 രൂപ ഇപ്പോൾ 11 രൂപ