കൊച്ചി: കൊറോണ വൈറസ് വ്യാപനത്തിന്റെ സാഹചര്യത്തിൽ എറണാകുളം മെഡിക്കൽ കോളേജിലേക്ക് വെന്റിലേറ്ററുകൾ അടക്കമുള്ള അടിയന്തര പ്രാധാന്യമുള്ള യന്ത്രസാമഗ്രികൾ വാങ്ങാൻ എം.പി ഫണ്ടിൽനിന്ന് ഒരുകോടി രൂപ അനുവദിക്കാൻ തയ്യാറാണെന്ന് എറണാകുളം ജില്ലാ കളക്ടറെ അറിയിച്ചതായി ഹൈബി ഈഡൻ എം. പി പറഞ്ഞു.

മെഡിക്കൽ കോളേജിൽ പരിമിതികൾക്കുള്ളിൽ നിന്ന് മികച്ച സൗകര്യങ്ങൾ ഒരുക്കിയിട്ടുണ്ട്. ജില്ലാ ഭരണകൂടവും ആരോഗ്യവകുപ്പ് ജീവനക്കാരും മികച്ച പ്രവർത്തനമാണ് കാഴ്ചവയ്ക്കുന്നത്. എന്നാൽ ഒരു അടിയന്തര സാഹചര്യം വന്നാൽ വെന്റിലേറ്ററുകളുടെ എണ്ണം വളരെക്കുറവാണ്. ഈ സാഹചര്യത്തിലാണ് എം. പി ഫണ്ടിൽ നിന്നും തുക അനുവദിക്കുന്നതെന്നും ഹൈബി ഈഡൻ എം. പി പറഞ്ഞു.

അടിയന്തര പ്രാധാന്യം കണക്കിലെടുത്ത് യന്ത്രസാമാഗ്രികൾ വാങ്ങുന്നതിനുള്ള നടപടികൾ സ്വീകരിക്കാൻ എം.പിമാരുടെ പ്രാദേശിക വികസനഫണ്ടിന്റെ ജില്ലയിലെ നടത്തിപ്പ് ചുമതലക്കാരൻ കൂടിയായ ജില്ലാ കളക്ടറോട് ആവശ്യപ്പെട്ടിട്ടുണ്ടെന്നും എം. പി പറഞ്ഞു.