കിഴക്കമ്പലം: പൊലീസ് നിയന്ത്റണം തെ​റ്റിച്ച് സഞ്ചരിച്ച വാഹനം തടഞ്ഞ പൊലീസുകാരെ കൈയേ​റ്റം ചെയ്ത സഹോദരങ്ങളെ അറസ്​റ്റ് ചെയ്തു. ചെമ്പറക്കി, നടക്കാവ് ഞാറക്കാട്ടിൽ നിഷാദിൽ(22), സഹോദരൻ നിഷാദ് (20) എന്നിവരെയാണ് തടിയിട്ടപറമ്പ് പൊലീസ് അറസ്​റ്റു ചെയ്തത്. ഇന്നലെ രാവിലെ ചെമ്പറക്കിയിൽ വാഹന പരിശോധനക്കിടെ ഇരുചക്ര വാഹനത്തിലെത്തിയ ഇവരെ കാര്യങ്ങൾ പറഞ്ഞ് മനസിലാക്കുന്നതിനിടെയിരുന്നു അക്രമം. വീട്ടു സാധനങ്ങൾ വാങ്ങാനായാണ് പുറത്തിറങ്ങിയതെന്നാണ് ഇവർ പറഞ്ഞത്. അതിന് ഒരാൾ പോരെയെന്ന് ചോദിച്ചതോടെ ഇവർ ക്ഷുഭിതരായി പൊലീസുകാരെ കൈയേ​റ്റം ചെയ്യുകയായിരുന്നു. ഇൻഫോപാർക്കിലെ സ്വകാര്യ സ്ഥാപനത്തിലെ ജീവനക്കാരനാണ് നിഷാദ്, കണ്ടന്തറയിൽ സ്വകാര്യ വാഹനത്തിലെ ഡ്രൈവറാണ് നിഷാദിൽ. ഔദ്യോഗിക കൃത്യ നിർവഹണം തടസപ്പെടുത്തിയതിനും പൊലീസിനെ കൈയ്യേറ്റം ചെയ്തതിനുമാണ് കേസ്. ഇവരെ റിമാൻഡ് ചെയ്തു.