മറയൂർ: പഴനി​- ശബരിമല തീർത്ഥാടന പാതയിൽ മറയൂരിന് സമീപം പള്ളനാട് ഭാഗത്ത് പാതയോരത്ത് നിന്ന ഉണക്കമരത്തിന്റെ വലിയ ശിഖരം ഒടിഞ്ഞു വീണു. ശിഖരം വൈദ്യുതി കമ്പിയിൽ തട്ടി കുടുങ്ങിയതിനാൽ താഴെ കൂടി കടന്നു പോയ നിരവധി വാഹനങ്ങൾ അപകടമുണ്ടാകാതെ രക്ഷപ്പെട്ടു. വിവരമറിയിച്ചതിനെ തുടർന്നാണ് വൈദ്യുതി ഓഫീസ് ജീവനക്കാർ കമ്പിയിൽ കുരുങ്ങി കിടന്ന വലിയ ശിഖരം വെട്ടിമാറ്റി ഗതാഗതം പുനഃസ്ഥാപിച്ചത്. നിരവധി മരങ്ങളാണ് ഈ സംസ്ഥാന പാതയിൽ അപകടകരമായ നിലയിൽ നിൽക്കുന്നത്. ഇവ മുറിച്ചുമാറ്റി അപകട സാഹചര്യം ഒഴിവാക്കണമെന്നാണ് നാട്ടുകാരുടെ ആവശ്യം.