ഇടുക്കി: മൂന്നാറിലെത്തി മടങ്ങിയ വിദേശ വിനോദസഞ്ചാരികൾക്ക് കൊറോണ സ്ഥിരീകരിച്ച സാഹചര്യത്തിൽ ഇടുക്കി ജില്ലയിൽ മാർച്ച് 31 വരെ ജില്ലാ കളക്ടർ സന്ദർശന വിലക്ക് ഏർപ്പെടുത്തി. ജില്ലയിൽ ആളുകൾ സംഘം ചേരുന്നതിനും കർശന നിയന്ത്രണങ്ങൾ ഏർപ്പെടുത്തി. മതപരമായ ചടങ്ങുകൾ, ഉത്സവങ്ങൾ, പെരുനാളുകൾ, വിവാഹം, ഗൃഹപ്രവേശം, മുതലായ ചടങ്ങുകളിൽ പെതു ജനപങ്കാളിത്തം പരമാവധി കുറയ്‌ക്കേണ്ടതും, പരമാവധി 10 പേരിൽ കൂടുതൽ പങ്കെടുക്കുന്നില്ലന്ന് ഉറപ്പാക്കേണ്ടതുമാണ്. ഇതു സംബന്ധിച്ച് ബന്ധപ്പെട്ടവർക്ക് മുൻകൂറായി നോട്ടീസ് നൽകുന്നതിനും നിർദേശങ്ങൾ ലംഘിക്കുന്നവർക്കെതിരെ നിയമ നടപടികൾ സ്വീകരിക്കുന്നതിനും ബന്ധപ്പെട്ട അധികാരികൾക്ക് നിർദേശം നൽകി.മൂന്നാർ പഞ്ചായത്തിൽ ഹോട്ടലുൾപ്പെടെയുള്ള വ്യാപാര സ്ഥാപനങ്ങളുടെ പ്രവർത്തന സമയം രാവിലെ 10 മുതൽ വൈകിട്ട് ആറ് വരെയായി ക്രമീകരിച്ചു. അത്യാവശ്യമല്ലാത്ത മൂന്നാർ സന്ദർശനം ഒഴിവാക്കണം. മൂന്നാറിലേക്ക് കടക്കുന്ന അതിർത്തികളിൽ കർശന പരിശോധന ഏർപ്പെടുത്തി. ജില്ലയിൽ നിലവിൽ 564 പേരാണ് വീടുകളിൽ നിരീക്ഷണത്തിലുള്ളത്. ആശുപത്രിയിൽ നിലവിലാരും ഇല്ല.