ഇടുക്കി : ജില്ലയിൽ ഒരാൾക്ക് കൂടി കൊറോണ സ്ഥിരീകരിച്ചതായി ജില്ലാ കളക്ടർ എച്ച്. ദിനേശൻ അറിയിച്ചു. ഇതോടെ ജില്ലയിലെ കൊറോണ.ബാധിതരുടെ എണ്ണം രണ്ടായി.ഇടുക്കി സ്വദേശിക്കാണ് രോഗമുള്ളതായി പരിശോധനയിൽ ബോദ്ധ്യപ്പെട്ടത് . ഇദ്ദേഹത്തെ തൊടുപുഴ ജില്ലാ ആശുപത്രി ഐസോലേഷൻ വാർഡിലേക്ക് മാറ്റി. ഇതോടെ ജില്ലയിൽ ഇതുവരെ രണ്ടു പേർക്ക് രോഗം ബാധിച്ചു. നേരത്തെ മുന്നാർ സന്ദർശനത്തിനെത്തിയ ബ്രിട്ടീഷ് പൗരനു രോഗം സ്ഥിരീകരിച്ചിരുന്നു. ഇദ്ദേഹം ഇപ്പോൾ സുഖം പ്രാപിച്ചു. ഇപ്പോൾ രോഗം സ്ഥിരീകരിച്ച പൊതുപ്രവർത്തകനായ ഇടുക്കി
സ്വദേശിയുമായി അടുത്ത ബന്ധം പുലർത്തിയിരുന്നവരോട് വീട്ടു നിരീക്ഷണത്തിലാകാൻ ആവശ്യപ്പെട്ടിട്ടുണ്ട്. ഇദ്ദേഹം പ്രമുഖരുൾപ്പെടെ വളരെയധികം ആളുകളുമായി ബന്ധപെട്ടിട്ടുണ്ട്. പാലക്കാട്, ഷോളയാർ, മറയൂർ, മൂന്നാർ, പെരുമ്പാവൂർ ,ആലുവ, മാവേലിക്കര ,തിരുവനന്തപുരം നിയമസഭാ മന്ദിരം എന്നിവിടങ്ങളിലും ചെറുതോണി മുസ്ലീം പള്ളിയിൽ മാർച്ച് 13നും 20നും പോയിരുന്നുവെന്ന് ജില്ലാ കളക്ടർ അറിയിച്ചു.