ഇടുക്കി : വിശക്കുന്നുണ്ടോ....പക്ഷേ ഭക്ഷണം കിട്ടാൻ വഴിയില്ല...ഒട്ടും ആശങ്കപ്പെടേണ്ടതില്ല, കൈയിൽ ഫോണുണ്ടെങ്കിൽ ഇനി അതില്ലെങ്കിൽ മറ്റാരുടെയെങ്കിലും ഫോണിൽ നിന്നോ കളക്ടറേറ്റിലെ കൺട്രോൾ റൂമിൽ ഒന്നു വിളിച്ചാൽ മതി തൊട്ടടുത്ത സമൂഹപാചക മുറിയിൽ നിന്ന് ഭക്ഷണം കൈയിലെത്തും. ഇടുക്കി ജില്ലയിൽ ആരും പട്ടിണി കിടക്കാൻ പാടില്ല എന്ന ലക്ഷ്യത്തോടെ ജില്ലയിൽ നിരീക്ഷണത്തിൽ കഴിയുന്നവർക്കും ഭക്ഷണം കഴിക്കുവാൻ നിവൃത്തിയില്ലാത്തവർക്കും യഥാസമയം ഭക്ഷണം എത്തിക്കുന്നതിനായി ജില്ലാ ഭരണകൂടത്തിന്റെ ആഭിമുഖ്യത്തിൽ ജില്ലാതല കൺട്രോൾ റൂം തുറന്നു. കൺട്രോൾ റൂമിലേക്കു വിളിക്കുന്ന ആളുടെ വിവരം പിന്നീട് തൊട്ടടുത്തുള്ള സമൂഹ പാചകമുറിയിലേക്ക് കൈമാറും. ഇവിടെനിന്ന് ഭക്ഷണം എത്തും. ഭക്ഷണം ലഭിക്കുവാൻ ബുദ്ധിമുട്ടുള്ള ആരെങ്കിലും ജില്ലയിൽ നിലവിലുണ്ടെങ്കിൽ താഴെക്കൊടുത്തിരിക്കുന്ന കൺട്രോൾ റൂം നമ്പറുകളിൽ ബന്ധപ്പെടാവുന്നതാണ്. കൺട്രോൾ റൂം പഞ്ചായത്ത് / മുനിസിപ്പാലിറ്റി തലത്തിൽ നിലവിലുള്ള കമ്മ്യൂണിറ്റി കിച്ചൺ മുഖേന ഭക്ഷണം ക്രമീകരിക്കുന്നതാണ്. ഫോൺ: 04862 233111, 233130, 9383463036