ഇടുക്കി : ജോലിക്കു പോകണ്ട, അവശ്യസാധനങ്ങളെത്തിച്ചു തരാം എന്ന പൊലീസ് ഉദ്യാഗസ്ഥരുടെ വാക്ക് പ്രാവർത്തികമാക്കി.തൊഴിലാളികൾക്ക് ആഹാരസാധനങ്ങളെത്തിച്ച് കമ്പംമെട്ട് പൊലീസാണ് വാക്കു പാലിച്ചത്. കൊറോണപ്രതിരോധ പ്രവർത്തനത്തിന്റെ ഭാഗമായി ലോക്ക് ഡൗൺ പ്രഖ്യാപിച്ച സാഹചര്യത്തിലും നിത്യവൃത്തിയ്ക്കായി കൂലിപ്പണിക്ക് പോകുന്ന തൊഴിലാളി കുടുംബങ്ങളിലാണ് കമ്പംമെട്ട്സി. ഐ ജി. സുനിൽകുമാറിന്റെ നേതൃത്വത്തിൽ ഭക്ഷ്യ സാധനങ്ങൾ എത്തിച്ചു നൽകിയത്. കഴിഞ്ഞ ദിവസങ്ങളിൽ ഓരോ തൊഴിലാളി കുടുംബ വീടുകളും കയറിയിറങ്ങി ഇനി ജോലിക്ക് ക്ക് പോകാൻ പാടില്ലെന്ന് ഉദ്യോഗസ്ഥർ മുന്നറിയിപ്പ് നൽകിയിരുന്നു. അവശ്യസാധനങ്ങൾ വേണ്ടവർ വിളിച്ചറിയിക്കണമെന്ന് നിർദേശവും നൽകിയിരുന്നു. ദിവസക്കൂലിക്ക് പണിക്ക് പോയിരുന്ന തൊഴിലാളികൾക്ക് പെട്ടെന്ന് ജോലി നിറുത്തിയാൽ വീട്ടാവശ്യത്തിന് സാധനങ്ങൾ വാങ്ങാൻ സാമ്പത്തിക ബുദ്ധിമുട്ട് ഉണ്ടാകുമെന്ന് മനസിലാക്കിയാണ് പൊലീസ് ഉദ്യോഗസ്ഥർ പലചരക്ക് ഉൾപ്പെടെയുള്ള അവശ്യസാധനങ്ങൾ എത്തിച്ചു നല്കിയത്. വിവിധ രാഷ്ട്രീയ, സന്നദ്ധ സംഘടനകളുടെ സഹകരണത്തോടെയാണ് പൊലീസ് അവശ്യസാധനങ്ങൾ ശേഖരിച്ച് അർഹരായവർക്ക് വിതരണം ചെയ്തത്.