കണ്ണൂർ: വാരത്ത് പ്രവാസിയുടെ വീട്ടിൽ വൻ കവർച്ച. പൂട്ടിയിട്ട വീട് കുത്തിതുറന്ന് 60 പവനും അര ലക്ഷം രൂപയും മൂന്ന് റോളക്‌സ് വാച്ചുകളും കവർന്നു. ഗൾഫിൽ ജോലി ചെയ്യുന്ന വാരം കടാങ്കോട്ട് സുനാനന്ദന്റെ വീട്ടിലാണ് കവർച്ച നടന്നത്.കഴിഞ്ഞ ജനുവരി അഞ്ച് മുതൽ അടച്ചിട്ട വീട്ടിലാണ് കവർച്ച നടന്നത്.

കൃഷി നനയ്ക്കാനായി രാവിലെ വീട്ടിലെത്തിയ അയൽവാസിയായ സ്ത്രീയാണ് കവർച്ച നടന്ന വിവരം ബന്ധുക്കളെ അറിയിച്ചത്. പരാതിയെ തുടർന്ന് ചക്കരക്കല്ല് പൊലീസ് സ്ഥലത്ത് എത്തി. മുൻവശത്തെ ജനൽപാളി കുത്തി തുറന്ന് ഗ്രിൽസ് അറുത്ത് മാറ്റിയാണ് മോഷ്ടാവ് അകത്ത് കടന്നത്. ബെഡ്രൂമിന്റെ പൂട്ട് പൊളിച്ച് രണ്ട് അലമാറകൾ തകർത്താണ് സ്വർണ്ണവും പണവും കവർന്നത്.ഒരു വിവാഹത്തിൽ പങ്കെടുക്കാൻ ഷാർജയിൽ നിന്നും നാട്ടിലെത്തിയ സുനാനന്ദനും ഭാര്യയും മകളും ജനുവരി അഞ്ചിനാണ് തിരിച്ചു പോയത്. വിവാഹാവശ്യത്തിനായി എടുത്ത ശേഷം വീട്ടിലെ അലമാറയിൽ സൂക്ഷിച്ച സ്വർണ്ണാഭരണങ്ങളാണ് കളവ് പോയതെന്നാണ് കരുതുന്നത്. ചക്കരക്കല്ല് പൊലീസും വിരലടയാള വിദഗ്ദരും ഡോഗ് സ്‌ക്വാഡും സ്ഥലത്തെത്തി പരിശോധന നടത്തി.