കാസർകോട്: കൊറോണയുമായി ബന്ധപ്പെട്ട് ജില്ലയിൽ നിരീക്ഷണത്തിലുള്ളത് 762 പേർ. ആശുപത്രികളിൽ 41 പേരും നിരീക്ഷണത്തിലുണ്ട്. മുൻകരുതലിന്റെ ഭാഗമായി നുള്ളിപ്പാടിയിലെ കെയർവെൽ ആശുപത്രി, ജനറൽ ആശുപത്രി എന്നിവിടങ്ങളിലും ഐസൊലേഷൻ സംവിധാനങ്ങൾ ഒരുക്കി. ജില്ലാ ആശുപത്രിയിലും ഐസൊലേഷൻ സംവിധാനം വിപുലീകരിച്ചു.

കൊറോണ ദിവസവും ജില്ലയിൽ റിപ്പോർട്ട് ചെയ്യപ്പെടുന്ന സാഹചര്യത്തിൽ പൊതുജനങ്ങൾ ജാഗരൂകരായിരിക്കണമെന്നും ആരോഗ്യ പ്രവർത്തകരുടെ നിർദ്ദേശങ്ങൾ കർശനമായി പാലിക്കണമെന്നും ജില്ലാ മെഡിക്കൽ ഓഫീസർ ഡോ. എ.വി രാംദാസ് പറഞ്ഞു. വിദേശത്തുനിന്നു വന്നവരും അവരുമായി അടുത്തിടപഴകിയവരും നിർബന്ധമായും വീടുകളിൽ നിരീക്ഷണത്തിൽ കഴിയുകയും കൊറോണ നിയന്ത്രണ സെല്ലുമായി ബന്ധപ്പെടുകയും ചെയ്യണം. കൊറോണ വൈറസ് സാമൂഹിക വ്യാപനം തടയുന്നതിനായി പൊതുജനസമ്പർക്കം ഒഴിവാക്കണമെന്നും ആരോഗ്യവകുപ്പ് അധികൃതർ പറഞ്ഞു.