കാസർകോട്: ജില്ലയിൽ ഇന്നലെ മൂന്ന് പേർക്ക് കൂടി കൊറോണ സ്ഥിരീകരിച്ചു. .ഇതോടെ ജില്ലയിലെ കൊറോണ വൈറസ് ബാധിതരുടെ എണ്ണം 47 ആയി. കൊറോണ സ്ഥിരീകരിച്ചത് 37 വയസുള്ള ചെങ്കള സ്വദേശി, 38 വയസുള്ള അണങ്കൂർ കൊല്ലംപാടി സ്വദേശി, 26 വയസ്സുള്ള ഉള്ളത്തടുക്ക സ്വദേശി എന്നിവർക്കാണ്. ഇതിൽ ചെങ്കള സ്വദേശി മാർച്ച് 21ന് കൊറോണ സ്ഥിരീകരിച്ച ദുബായിൽ നിന്നുള്ള വ്യക്തിയെ കോഴിക്കോട് വിമാനത്താവളത്തിൽ നിന്ന് വാഹനത്തിൽ കൂട്ടികൊണ്ടുവന്ന ആളാണ്. കൊല്ലംപാടി, ഉളിയത്തടുക്ക സ്വദേശികൾ മാർച്ച് 21 ന് ദുബായിൽ നിന്ന് ബംഗളൂരു വിമാനത്താവളത്തിലിറങ്ങി അവിടെ നിന്ന് സ്വകാര്യ വാഹനത്തിൽ കാസർകോടെത്തിയവരാണെന്ന് ഡി.എം.ഒ ഡോ.എ.വി.രാംദാസ് പറഞ്ഞു. നിലവിൽ 4798 പേരാണ് നിരീക്ഷണത്തിലുള്ളത്. ഇതിൽ 100 പേർ ആശുപത്രികളിലും, 4698 പേർ വീടുകളിലുമാണ്. ഇന്നലെ മാത്രം അഞ്ച് പേരുടെ സാമ്പിളുകളാണ് പരിശോധനയ്‌ക്ക് അയച്ചത്.