തിരുവനന്തപുരം: കൊറോണ രോഗവ്യാപനത്തിന്റെ പശ്ചാത്തലത്തിൽ ആകാശവാണി കേരള നിലയം പ്രക്ഷേപണം ചെയ്യുന്ന വാർത്തകളുടെ സമയം പുനഃക്രമീകരിച്ചതായി വാർത്താവിഭാഗം മേധാവി എ.എം. മയൂഷ അറിയിച്ചു. നിലവിൽ പ്രക്ഷേപണം ചെയ്തിരുന്ന രാവിലെ 7.25, ഉച്ചയ്ക്ക് 12.50, രാത്രി 7.25 വാർത്തകൾക്ക് പകരം രാവിലെ 10.15, ഉച്ചക്ക് 2.55, വൈകിട്ട് 5.00, രാത്രി 9.00 എന്നീ സമയങ്ങളിൽ പ്രത്യേക വാർത്തകൾ പ്രക്ഷേപണം ചെയ്യും.

രാവിലെ 6.45, ഉച്ചയ്ക്ക് 12.30, വൈകിട്ട് 6.20 എന്നീ സമയങ്ങളിലെ പ്രാദേശിക വാർത്തകൾ മാറ്റമില്ലാതെ തുടരും. പരമാവധി വാർത്തകൾ ശ്രോതാക്കൾക്ക് എത്തിക്കുന്നതിനായി ഇവയുടെ സമയവും നീട്ടിയിട്ടുണ്ട്. ഇതിന് പുറമെ രാവിലെ ആറിന് ആരംഭിച്ച് രാത്രി പത്തിന് അവസാനിക്കുന്ന ആകാശവാണി എഫ്.എം.സ്റ്റേഷനുകളുടെ ഒരു മണിക്കൂർ ഇടവിട്ടുള്ള പ്രധാനവാർത്തകൾക്കും മാറ്റമില്ല. നിലവിലെ രാവിലെയും വൈകിട്ടും ഡൽഹി നിലയത്തിൽ നിന്നുള്ള ഇംഗ്ലീഷ്, ഹിന്ദി വാർത്തകളുടെ ദൈർഘ്യവും വർദ്ധിപ്പിച്ചിട്ടുണ്ട്. കൊറോണ പ്രതിരോധ നടപടികൾ സംബന്ധിച്ച കേന്ദ്രസർക്കാർ നിർദേശങ്ങളുടെ ഭാഗമായാണ് ഈ മാറ്റം.