കോഴിക്കോട്: ആരോഗ്യ രംഗത്ത് വൻ മാറ്റം ലക്ഷ്യമിട്ടുള്ള ഇ-ഹെൽത്ത് പദ്ധതിയുടെ ജില്ലയിലെ പ്രവർത്തനം പുരോഗമിക്കുന്നു. മേയ് അവസാനത്തോടെ ജില്ലയിൽ പദ്ധതി ആരംഭിക്കാൻ സാധിക്കുമെന്നാണ് ആരോഗ്യ വകുപ്പിന്റെ വിലയിരുത്തൽ. ആരോഗ്യവകുപ്പിന്റെ ആർദ്രത്തിന്റെ ഭാഗമായി ചികിത്സയും സേവനങ്ങളും ഓൺലൈൻ വഴിയാക്കുന്ന വിപുലമായ പദ്ധതിയാണ് ഇ- ഹെൽത്ത്. ആദ്യ ഘട്ടം ഈ മാസം പൂർത്തിയാകും. ചിലയിടങ്ങളിൽ ഇ-ഹെൽത്തിലൂടെ രജിസ്ട്രേഷനും ആരംഭിച്ചു.

 പദ്ധതി നടപ്പാക്കുന്നത് രണ്ട് ഘട്ടങ്ങളിൽ

രണ്ട് ഘട്ടങ്ങളിലായി 34 കുടുംബാരോഗ്യ കേന്ദ്രങ്ങളിലും (എഫ്.എച്ച്‌.സി) ഗവ. മെഡിക്കൽ കോളേജിലുമാണ് മേയിൽ ഇ-ഹെൽത്ത് നടപ്പാക്കുന്നത്. ആദ്യ ഘട്ടത്തിലെ എഫ്.എച്ച്‌.സികളിൾ ഈ മാസം പദ്ധതി ആരംഭിക്കും. മെഡിക്കൽ കോളേജിൽ സാങ്കേതിക പ്രവർത്തനങ്ങളും അവസാന ഘട്ടത്തിലാണ്. രണ്ടാം ഘട്ടത്തിൽ എഫ്.എച്ച്‌.സികളിൽ മേയിൽ ഇ- ഹെൽത്ത് നടപ്പാക്കും.

 ഇ - ഹെൽത്ത് തുടങ്ങിയ എഫ്.എച്ച്‌.സികൾ

പനങ്ങാട്, പുതുപ്പാടി, വടകര

 ഈമാസം തുടങ്ങുന്നവ

രാമനാട്ടുകര, ഓമശേരി, മേപ്പയ്യൂർ, കുന്ദമംഗലം, അരിക്കുളം, എടച്ചേരി, കായക്കൊടി, നൊച്ചാട്

 നടപ്പാക്കുന്നത് കെൽട്രോൺ

സോഫ്ട്‌വെയറിലൂടെ സർക്കാർ ആശുപത്രികളെ ബന്ധിപ്പിക്കുന്ന ഇ- ഹെൽത്ത് പദ്ധതിയാക്കായി സാങ്കേതിക പ്രവർത്തനം നടത്തുന്നത് കെൽട്രോണാണ്. ഓരോ കുടുംബാരോഗ്യ കേന്ദ്രത്തിനും 15 ലക്ഷം രൂപയാണ് ചെലവ്

നേട്ടങ്ങൾ

 രോഗിയുടെ ആരോഗ്യ വിവരം ഡിജിറ്റലായി ലഭിക്കും

 രോഗ നിർണയവും ചികിത്സയും എളുപ്പമാകും

 ബുക്കിംഗ് സൗകര്യം ലഭിക്കും

 ആരോഗ്യ വിവരങ്ങളുടെ സമഗ്രത ഉറപ്പാക്കും

 സാംക്രമിക രോഗങ്ങൾ തടയാനാകും

 തുടർ ചികിത്സ എളുപ്പമാകും

 തിരക്ക് കുറയ്‌ക്കാം

 ആശുപത്രികൾ ഡിജിറ്റലാകും

 ക്ഷേമ പരിരക്ഷകളുടെ കൃത്യത ഉറപ്പാക്കാം

 സർട്ടിഫിക്കറ്റുകൾ സമയബന്ധിതമായി വിതരണം ചെയ്യും