രാമനാട്ടുകര: ജില്ലാ അതിർത്തിയി​ലെ ​ വൈദ്യരങ്ങാടി - രാമനാട്ടുകര ഹൈസ്‌കൂൾ റോഡിന്റെ ശോചനീയാവസ്ഥ തീർക്കാൻ ഒടുവിൽ അറ്റകുറ്റപ്പണി തുടങ്ങി.

റോഡ് എത്രയും പെട്ടെന്ന് നന്നാക്കിക്കിട്ടാൻ നാട്ടുകാർ​ ​സമരത്തിന് ​ഒരുങ്ങുന്നു​വെന്ന വാർത്ത കേരള കൗമുദി പ്രസിദ്ധീകരിച്ചിരുന്നു. വൈകാതെ ഇന്നലെ റോഡ് പണിയ്ക്ക് തുടക്കമിട്ടു.

റോഡ് പൊട്ടിപ്പൊളിഞ്ഞ് കാൽനടയാത്രയ്ക്കു പോലും പറ്റാത്ത പരുവത്തിലായി​രുന്നു. ​രാമനാട്ടുകര നഗരസഭയിലെ 12,13 ഡിവിഷനിലൂടെ പോകുന്ന റോഡിന് 851 മീറ്റർ നീള​മേയുള്ളൂ. വീതി 4.7 മീറ്ററും. അടുത്തിടെ വാട്ടർ അതോറിറ്റിയുടെ ചീക്കോട് പദ്ധതിയ്ക്ക് പൈപ്പിടുന്നതിനായി ചാലുകൾ കീറിയതോടെയാണ് പ്രശ്നം സങ്കീർണമായത്. രാമനാട്ടുകര ഹയർ സെക്കൻഡറി സ്കൂളിലേക്കുള്ള പ്രധാന റോഡാണെന്നിരിക്കെ ദിവസവും ആയിരത്തോളം വിദ്യാർത്ഥികളെങ്കിലും ഉപയോഗിക്കുന്നുണ്ട് ഈ വഴി.

റോഡിന്റെ കുറച്ചുഭാഗം മാത്രമാണ് കോഴിക്കോട് ജില്ലയിൽ. ബാക്കി മലപ്പുറം ജില്ലയുടെ പരിധിയിലാണ്. ആ ഭാഗത്ത് എം.എൽ. എ ഫണ്ട് ഉപയോഗിച്ച് പണി നടക്കുന്നുണ്ട്.

ഈയിടെ ഈ റോഡിന്റെ അറ്റകുറ്റപ്പണിയ്ക്ക് അധികൃതർ കരാറുകാരെ ഏല്പിച്ചതാണ്. എന്നാൽ പണിയിലെ പൊള്ളത്തരം ചോദ്യം ചെയ്യപ്പെട്ടതോടെ അധികൃതർ പണി നിറുത്തിവെപ്പിച്ചു. മാർച്ച് തീരുമ്പോഴേക്കും ഫണ്ട് ലാപ്സാവുമെന്ന ആശങ്ക​യിലായിരുന്നു നാട്ടുകാർ​.