കോഴിക്കോട്: കൊറോണ തടയാനുള്ള മുൻകരുതൽ നടപടികളുടെ ഭാഗമായി എല്ലാ ഹോട്ടലുകളിലും റിസോർട്ടുകളിലും സാനിറ്റൈസറുകൾ സ്ഥാപിക്കണമെന്ന് ജില്ലാ കളക്ടർ സാംബശിവ റാവു നിർദേശിച്ചു. മുറികൾ വൃത്തിയാക്കുന്നതിന് അണുനാശിനി ഉപയോഗിക്കണം. ഇവിടങ്ങൾ വൃത്തിയാക്കുന്നവർക്ക് നിർബന്ധമായും മാസ്‌ക്, ഗ്ലൗസ്, സാനിറ്റൈസർ തുടങ്ങിയവ നൽകണം. ലിഫ്റ്റ് നിശ്ചിത ഇടവേളകളിൽ അണുവിമുക്തമാക്കണം. ആളുകൾ കൂടുന്ന ചടങ്ങുകൾക്ക് ആവശ്യമായ മുൻകരുതലുകളെടുക്കണം. വ്യക്തികൾ തമ്മിൽ നിശ്ചിത അകലം ഉണ്ടാക്കാൻ ശ്രദ്ധിക്കണം.

വിദേശത്തു നിന്നെത്തുന്നവരുടെ വിശദാംശങ്ങൾ ഹോട്ടൽ മാനേജ്‌മെന്റ് ജില്ലാ ഭരണകൂടത്തെ അറിയിക്കേണ്ടതാണ്. നിരീക്ഷണത്തിലുള്ളവരെ മുറിയിൽ നിന്ന് പുറത്ത് പോകാൻ അനുവദിക്കരുത്. നിരീക്ഷണത്തിൽ കഴിയാൻ തയ്യാറാവാതിരിക്കുകയോ പൊതുസ്ഥലങ്ങളിൽ സഞ്ചരിക്കുകയോ ചെയ്താൽ വിവരം ജില്ലാ ഭരണകൂടത്തെ അറിയിക്കണം. വിദേശത്തു നിന്ന് വരുന്ന ഒരു വ്യക്തിയുടെ യാത്രാ ചരിത്രമെടുത്ത് ഉച്ചയ്‌ക്ക് 12ന് മുമ്പ് ജില്ലാ ഭരണകൂടത്തിന് കൈമാറണമെന്നും ചെയ്യണമെന്ന് കളക്ടർ അറിയിച്ചു.