രാമനാട്ടുകര: സർക്കാർ നിർദ്ദേശങ്ങൾ ഉൾക്കൊണ്ട് കൊറോണ ഭീതി മൂലം ജനങ്ങൾ വിട്ടു നിൽക്കുന്നതിനാൽ വ്യാപാരമേഖല രൂക്ഷമായ പ്രതിസന്ധിയിലായ സാഹചര്യത്തിൽ കെട്ടിട ഉടമകൾ മൂന്ന് മാസത്തേക്ക് വാടക ഒഴിവാക്കണമെന്ന് കേരള വ്യാപാരി വ്യവസായി ഏകോപന സമിതി രാമനാട്ടുകര യൂണിറ്റ് യോഗം ആവശ്യപ്പെട്ടു. യോഗത്തിൽ പ്രസിഡന്റ് അലി പി. ബാവ അദ്ധ്യക്ഷത വഹിച്ചു. സലീം രാമനാട്ടുകര, പി.എം അജ്മൽ, കെ.കെ ശിവദാസ്, പി പി എ നാസർ, സി അബ്ദുൽ ഖാദർ, സി ദേവൻ, ടി മമ്മദ് കോയ, പി ടി ചന്ദ്രൻ, എം കെ സമീർ എന്നിവർ സംസാരിച്ചു.
കൊറോണയും പക്ഷിപ്പനിയും മൂലം പ്രയാസപ്പെടുന്ന രാമനാട്ടുകര മുനിസിപ്പൽ ഷോപ്പിംഗ് കോംപ്ലക്‌സിലെ വ്യാപാരികൾക്ക് മൂന്നു മാസത്തെ കെട്ടിട വാടക ഒഴിവാക്കണമെന്ന് ആവശ്യപ്പെട്ട് യൂണിറ്റ് ഭാരവാഹികൾ മുനിസിപ്പൽ ചെയർമാൻ വാഴയിൽ ബാലകൃഷ്ണന് നിവേദനം നൽകിയിട്ടുമുണ്ട്.