കോഴിക്കോട്: പട്ടികജാതി, പട്ടികവർഗ്ഗ മേഖലകളിൽ കൊറോണ പ്രതിരോധത്തിനും അടിയന്തര സഹായത്തിനും സർക്കാർ നടപടി തുടങ്ങി. പട്ടികജാതി സങ്കേതങ്ങളിലും പട്ടികവർഗ്ഗ ഊരുകളിലും പനി, ജലദോഷം തുടങ്ങിയ രോഗലക്ഷണങ്ങളുള്ളവരെ കണ്ടെത്തി ആരോഗ്യവകുപ്പിന്റെ നിരീക്ഷണത്തിൽ കൊണ്ടുവരുന്നതിന് പ്രമോട്ടർമാരെ ചുമതലപ്പെടുത്തി. ഇതിനായി 31ന് കാലാവധി അവസാനിക്കുന്ന പ്രമോട്ടർമാരുടെ സേവനം മേയ് 31വരെ ദീർഘിപ്പിച്ചു.
ആരോഗ്യവകുപ്പിന്റെ സഹകരണത്തോടെ പട്ടികജാതി സങ്കേതങ്ങളിലും പട്ടികവർഗ്ഗ ഊരുകളിലും കൊറോണ പ്രതിരോധ പ്രചാരണം നടത്തും. സങ്കേതങ്ങളും ഊരുകളും സന്ദർശിച്ച് പ്രമോട്ടർമാർ രോഗലക്ഷണങ്ങളുള്ളരെ കണ്ടെത്തി യാത്രാവിവരങ്ങൾ ശേഖരിച്ച് ആരോഗ്യവകുപ്പ് അധികൃതരെ അറിയിക്കും. പ്രമോട്ടർമാരുടെ പ്രതിരോധ, പ്രചാരണ പ്രവർത്തനങ്ങൾ ജില്ലാ തലത്തിൽ ഏകോപിപ്പിക്കുന്നതിനും പരോഗതി വിലയിരുത്തുന്നതിനും റിപ്പോർട്ട് ലഭ്യമാക്കുന്നതിനും അതാത് ജില്ലാ പട്ടികജാതി വികസന ഓഫീസർമാരെയും പ്രൊജക്ട് ഓഫീസർമാരെയും ചുമതലപ്പെടുത്തി.
ഐസൊലേഷനിലോ നിരീക്ഷണത്തിലോ ഉള്ള പട്ടികവിഭാഗം കുടുംബങ്ങൾക്ക് അതിജീവനത്തിന് സഹായം ആവശ്യമുണ്ടെങ്കിൽ ജില്ലാ ഭരണകൂടത്തിന്റെയോ തദ്ദേശസ്ഥാപനങ്ങളുടെയോ സഹകരണത്തോടെ ക്രമീകരണങ്ങളൊരുക്കും.
പോഷകാഹാര കിറ്റ് നൽകും
പട്ടികവർഗ്ഗ ഊരുകളിൽ 60 വയസിന് മുകളിൽ പ്രായമുള്ളവർക്ക് പ്രത്യേക പോഷകാഹാര കിറ്റ് നൽകും. 500 ഗ്രാം വീതം ചെറുപയർ, വൻപയർ, കടല, ശർക്കര, വെളിച്ചെണ്ണ, രണ്ട് കിലോ നുറുക്ക് ഗോതമ്പ് എന്നിവയാകും കിറ്റിലുണ്ടാവുക. കൂടാതെ പട്ടികവർഗ്ഗ വികസന വകുപ്പിന്റെ ഫുഡ് സപ്പോർട്ട് പ്രോഗ്രാം പ്രകാരം ആവശ്യമുള് ഊരുകളിൽ ഭക്ഷണ സാധനങ്ങൾ നൽകും.
രണ്ട് വകുപ്പിന്റെയും കീഴിലുള്ള ഹോസ്റ്റലുകളുടെയും മോഡൽ റസിഡൻഷ്യൽ സ്‌കൂളുകളുടെയും പ്രവർത്തനം നിർത്തിവെച്ചിട്ടുണ്ട്. ഈ സ്ഥാപനങ്ങളിലെ കുട്ടികൾക്കായി കരുതിയ ഭക്ഷ്യധാന്യങ്ങൾ അവർക്ക് തന്നെ വിതരണം ചെയ്യും.
തൊഴിൽ ഉറപ്പാക്കും
തൊഴിൽ നഷ്ടപ്പെടുന്നവർക്ക് അവരെ തൊഴിലുറപ്പ് പദ്ധതിയുമായി ബന്ധപ്പെടുത്തി തൊഴിൽ ലഭ്യത ഉറപ്പുവരുത്തും.
ആരോഗ്യ സന്നദ്ധ പ്രവർത്തകരെ അനുമോദിക്കും
ഇന്ന് വൈകിട്ട് അഞ്ചിന് ഊരുകളിൽ കൂട്ടം കൂടാതെ ഓരോ വീട് മാത്രം കേന്ദ്രീകരിച്ച് അവരവരുടെ പാരമ്പര്യ വാദ്യോപകരണങ്ങൾ വായിച്ച് പ്രതിരോധ പ്രവർത്തനങ്ങൾക്ക് നേതൃത്വം നൽകുന്ന ആരോഗ്യ സന്നദ്ധ പ്രവർത്തകരെ അനമോദിക്കും. ബ്രേക്ക് ദ ചെയിൻ കാമ്പയിൻ രണ്ട് വകുപ്പിന്റെയും എല്ലാ ഓഫീസുകളിലും പ്രമോട്ടർമാർ മുഖേന സങ്കേതങ്ങളിലും ഊരുകളിലും നടപ്പാക്കും.