കോഴിക്കോട്: കാലിക്കറ്റ് സർവകലാശാലയിൽ വിദ്യാർത്ഥികൾക്ക് യൂണിവേഴ്‌സിറ്റിയിൽ വരാതെ തന്നെ വിവിധ സേവനങ്ങൾ സംബന്ധിച്ച വിവരങ്ങൾ ലഭിക്കുന്നതിനും അപേക്ഷകളുടെ തത്‌സ്ഥിതി അറിയുന്നതിനും ഇഹെൽപ്പ് പദ്ധതി തുടങ്ങി. http://support.uoc.ac.in എന്ന വെബ്‌സൈറ്റിലൂടെ വിവരങ്ങൾ അറിയാം. support@uoc.ac.in എന്ന അഡ്രസിലേക്ക് ഇമെയിൽ ചെയ്താലും വിവരങ്ങൾ ലഭിക്കും. സൈറ്റിൽ സർവകലാശാലയുടെ വിവിധ സേവനങ്ങളെക്കുറിച്ച വിശദമായ ചോദ്യങ്ങളും ഉത്തരങ്ങളും ലഭിക്കും. പുതിയ കാര്യങ്ങൾ ചോദിക്കുന്നതിനുള്ള സെക്ഷനും ഉൾപ്പെടുത്തി. ഇത്തരം അന്വേഷണങ്ങൾ പരീക്ഷാഭവൻ, ജനറൽ ആൻഡ് അക്കാഡമിക് വിഭാഗം, റിസർച്ച് ഡയറക്ടർ, അഡ്മിഷൻ ഡയറക്ടർ, ഇക്വവലൻസി തുടങ്ങിയ വിഭാഗങ്ങളിലേക്ക് കണക്ട് ചെയ്യും.

24 മണിക്കൂറിൽ മറുപടി ലഭിക്കത്തക്ക രീതിയിലാണ് ഇഹെൽപ്പ് പദ്ധതി ആവിഷ്‌കരിച്ചിരിക്കുന്നത്. കാലിക്കറ്റ് സർവകലാശാലാ കമ്പ്യൂട്ടർ സെന്ററാണ് പദ്ധതി തയ്യാറാക്കിയത്. ഇഹെൽപ്പ് പദ്ധതി പരീക്ഷാ കൺട്രോളർ ഡോ.സി.സി.ബാബു ഉദ്ഘാടനം ചെയ്‌തു. ചടങ്ങിൽ രജിസ്ട്രാർ ഡോ. സി.എൽ. ജോഷി, കമ്പ്യൂട്ടർ സെന്റർ ഡയറക്ടർ ഡോ. വി.എൽ. ലജീഷ്, പബ്ലിക് റിലേഷൻസ് ഓഫീസർ ഒ. മുഹമ്മദലി, സി. ജ്യോതികുമാർ, ഗിരീഷ് ഷേണായി, നസീമുദ്ദീൻ എന്നിവർ പങ്കെടുത്തു.