കോഴിക്കോട്: തെരുവോരത്ത് അന്തിയുറങ്ങുന്ന 571 പേരെ കഴിഞ്ഞ രണ്ട് ദിവസങ്ങളിലായി ജില്ലാ ഭരണകൂടത്തിന്റെ നേതൃത്വത്തിൽ സുരക്ഷിതസ്ഥലത്തേക്ക് മാറ്റി. വെസ്റ്റ്ഹിൽ യൂത്ത് ഹോസ്റ്റൽ, പ്രീമെട്രിക് ഹോസ്റ്റൽ, പോസ്റ്റ് മെട്രിക് ഹോസ്റ്റലുകൾ, ഫിസിക്കൽ എജ്യുക്കേഷൻ കോളേജ് ഹോസ്റ്റൽ, ബി.ഇ.എം എച്ച്.എസ് സ്‌കൂൾ, ഗവ. മോഡൽ സ്‌കൂൾ എന്നിവിടങ്ങളിലായാണ് ഇവരെ പുനരധിവസിപ്പിച്ചത്.
വിവിധ വകുപ്പുകളുടെയും സന്നദ്ധസംഘടനകളുടെയും സഹകരണത്തോടെ ഇവർക്ക് മൂന്നു നേരം ഭക്ഷണത്തിനു പുറമെ മറ്റു പരിചരണവും നൽകുന്നുണ്ട്. ഇഖ്‌റ ഹോസ്‌പിറ്റലുമായി സഹകരിച്ച് വൈദ്യപരിശോധനയും മാനസികാരോഗ്യ ക്യാമ്പും സംഘടിപ്പിച്ചു. കുതിരവട്ടം മാനസികാരോഗ്യ കേന്ദ്രത്തിന്റെ ജില്ലാ മെന്റൽ ഹെൽത്ത് പ്രോഗ്രാമിലെ വിദഗ്ദസംഘം മാനസിക പ്രയാസമനുഭവിക്കുന്നവരെ പരിശോധിച്ചു.
അഗതികൾ, വൃദ്ധർ, അതിഥിതൊഴിലാളികൾ എന്നിവരുടെ സുരക്ഷയും ക്ഷേമവും ലക്ഷ്യമിട്ട് ജില്ലാ ഭരണകൂടം സാമൂഹ്യനീതി വകുപ്പിന്റെ നേതൃത്വത്തിൽ വിവിധ സന്നദ്ധസംഘടനകളുടെ സഹകരണത്തോടെയാണ് പ്രവർത്തനങ്ങൾ ഏകോപിപ്പിക്കുന്നത്.