മാനന്തവാടി: നിരോധനാജ്ഞ ലംഘിച്ച് കുർബാന നടത്തിയതിന് ചെറ്റപ്പാലം മിഷനറീസ് ഓഫ് ഫെയ്‌ത്ത് മൈനർ സെമിനാരിയിലെ വികാരി ഫാദർ ടോം ജോസഫ് ഉൾപ്പെടെ പത്തു പേരെ മാനന്തവാടി പൊലീസ് ഇൻസ്‌പെക്ടർ അബ്ദുൾകരീം, എസ്.ഐ അനിൽകുമാർ എന്നിവരുടെ നേതൃത്വത്തിലുള്ള സംഘം അറസ്റ്റ് ചെയ്തു.

അസി.വികാരി ഫാദർ പ്രിൻസ്, ബ്രദർ സന്തോഷ്, സിസ്റ്റർമാരായ സന്തോഷ, നിത്യ, മേരി ജോൺ, ഒപ്പമുണ്ടായിരുന്ന ആഞ്ജലോ, ജോസഫ്, സുബിൻ, മിഥുൻ എന്നിവരാണ് അറസ്റ്റിലായ മറ്റുള്ളവർ. ഇന്നലെ രാവിലെ എട്ടു മണിയോടെയാണ് സംഭവം.

നിരോധനാജ്ഞ ലംഘിച്ചതിനുള്ള കേസിനു പുറമെ സംസ്ഥാന സർക്കാരിന്റെ എപ്പിഡമിക് ഡിസീസസ് ഓർഡിനൻസ് (2020) പ്രകാരവും നടപടി സ്വീകരിക്കുന്നുണ്ടെന്ന് സി.ഐ പറഞ്ഞു. ഇതുപ്രകാരം രണ്ടു വർഷം വരെ തടവും പതിനായിരം രൂപ വരെ പിഴയുമാണ് ശിക്ഷ.