അടിമാലി: വനിതാ ദിനത്തിൽ അടിമാലി പൊലീസ് സ്റ്റേഷന്റെ നിർവ്വഹണ ചുമതല ഏറ്റെടുത്ത് പതിനാറംഗ വനിതാപൊലീസ് ഉദ്യോഗസ്ഥർ. ഇടുക്കിയിൽ അടിമാലി ഉൾപ്പെടെ മൂന്ന് പൊലീസ് സ്റ്റേഷനുകൾ വനിതകൾക്കായി വഴിമാറി.സബ് ഇൻസ്‌പെക്ടർ എസ് സുലേഖയുടെ നേതൃത്വത്തിലുള്ള വനിതാ പൊലീസ് സംഘത്തിനായിരുന്നു അടിമാലി സ്റ്റേഷന്റെ ചുമതല.സ്റ്റേഷൻ ഹൗസ് ഓഫീസർ, പിആർഒ, റൈറ്റർ, പാറവ്, ഡ്രൈവർ തുടങ്ങി കേസുകൾ രജിസ്റ്റർ ചെയ്തതും പരാതി അദാലത്ത് നടത്തിയതും പട്രോളിംഗ് നടത്തിയതുമെല്ലാം വനിതാ ഉദ്യോഗസ്ഥർ തന്നെ.വനിതാദിനാഘോഷത്തിന്റെ ഭാഗമാകാൻ സാധിച്ചതിൽ സന്തോഷമുണ്ടെന്ന് സബ് ഇൻസ്‌പെക്ടർ എസ് സുലേഖ പറഞ്ഞു.വനിതാദിനത്തിൽ അടിമാലി സ്റ്റേഷനിലെത്തിയ മൂന്നാർ ഡിവൈഎസ്പി എം രമേശ്കുമാറിന് പെൺകരുത്തിന്റെ കൈകൾ സല്യൂട്ട് നൽകി.ആഘോഷങ്ങളുടെ ഭാഗമായി ഡിവൈഎസ്പി വനിതാ ഉദ്യോഗസ്ഥർക്കൊപ്പം മധുരം പങ്കിട്ടു.പരാതിയുമായി സ്റ്റേഷനിലെത്തിയ സ്ത്രീകളുടെ പ്രശ്നത്തിൽ സബ് ഇൻസ്‌പെക്ടർ എസ് സുലേഖയടക്കം കൃത്യമായ ഇടപെടൽ നടത്തി.സ്റ്റേഷന്റെ മുഴുവൻ ചുമതലയും വനിതാപൊലീസുകാർ ഏറ്റെടുത്തത് സ്റ്റേഷനിലെത്തിയ പരാതികാർക്കും കൗതുകം സമ്മാനിച്ചു.