കോട്ടയം : ഇറഞ്ഞാൽ - പൊൻപള്ളി റോഡിലെ പെപ്പ് പൊട്ടിയതിനെ തുടർന്ന് മുടങ്ങിയ കുടിവെള്ള വിതരണം പുന:സ്ഥാപിച്ചു. പൂവത്തുമ്മൂട്ടിൽ നിന്ന് കോട്ടയം നഗരത്തിലെ ഓവർഹെഡ് ടാങ്കിലേക്ക് വെള്ളം എത്തിക്കുന്ന പ്രധാന പൈപ്പ് ലൈനുകളിൽ ഒന്നാണ് ശനിയാഴ്ച രാത്രി ഏഴരയോടെ പൊട്ടിയത്. റോഡിന്റെ കോൺക്രീറ്റ് അടക്കം വലിയൊരു ഭാഗം പൂർണമായി തകർന്നിരുന്നു. ഇതോടെ വാഹനം ഒരു വശത്തുകൂടെയാണ് കടന്നു പോയത്. നഗരത്തിലേക്കു വെള്ളം എത്തിക്കാൻ മൂന്നു പൈപ്പ് ലൈനുകളാണുള്ളത്. ഇതിൽ രണ്ടെണ്ണം മാത്രമേ ഉപയോഗിക്കുന്നുളളൂ. ഒരെണ്ണം പൊട്ടിയതോടെ സമാന്തരമായുള്ള മറ്റൊരു ലൈനിലൂടെ വെള്ളം കടത്തിവിട്ടു. നിലവിൽ പൊട്ടിയ പൈപ്പ് നന്നാക്കുന്നില്ല. റബർബോർഡ് പാലത്തിന്റെ നിർമ്മാണത്തിനായി ഈ പൈപ്പ്‌ലൈൻ മാറ്റിക്കൊടുക്കണം. പാലം നിർമ്മാണത്തിന് ശേഷം പൈപ്പ് നന്നാക്കാനാണ് തീരുമാനം. റോഡ് വാട്ടർ അതോറിറ്റിയുടെ ചുമതലയിൽ കോൺക്രീറ്റ്‌ ചെയ്ത് ഗതാഗതയോഗ്യമാക്കും.