മംഗളൂരു: ബംഗളൂരു- മംഗളൂരു ദേശീയ പാതയിൽ കാറുകൾ തമ്മിൽ കൂട്ടിയിടിച്ച് 13 പേർ മരിച്ചു. അപകടത്തിൽ അഞ്ച് പേർക്ക് സാരമായി പരിക്കേറ്റു. വെള്ളിയാഴ്ച പുലർച്ചെ മൂന്ന് മണിയോടെ തുമകുരു ജില്ലയിൽ കുനിഗൽ എന്ന സ്ഥലത്താണ് സംഭവം. പരിക്കേറ്റവരെ സമീപത്തെ ആശുപത്രിയിൽ പ്രവേശിപ്പിച്ചു.

ഹാസനിൽ നിന്ന് ബംഗളൂരുവിലേക്ക് പോകുകയായിരുന്ന കാർ എതിർദിശയിൽ വരികയായിരുന്ന കാറിൽ ഇടിക്കുകയായിരുന്നു. സംഭവസ്ഥലത്തുവെച്ച് തന്നെ എല്ലാവരും മരണപ്പെട്ടു. മരിച്ചവർ ബംഗളൂരു, ഹൊസൂര്‍, തമിഴ്‌നാട് എന്നിവിടങ്ങളില്‍ ഉള്ളവരാണ്. അപകടത്തെത്തുടർന്ന് രണ്ട് മണിക്കൂറോളം ദേശീയ പാതയിൽ ഗതാഗതക്കുരുക്കുണ്ടായി. അപകടത്തെക്കുറിച്ച് പൊലീസ് അന്വേഷണം ആരംഭിച്ചു.