കൊച്ചി: ചവറ എം.എൽ.എ എൻ വിജയൻ പിള്ള അന്തരിച്ചു. കൊച്ചിയിലെ സ്വകാര്യ ആശുപത്രിയിൽ പുലർച്ചെ മൂന്ന് മണിക്കായിരുന്നു അന്ത്യം. രണ്ട് മാസമായി കരൾ രോഗത്തിന് ചികിത്സയിലായിരുന്നു. സംസ്കാരം തിങ്കളാഴ്ച ചവറ ശങ്കരമംഗലത്തെ വീട്ടുവളപ്പിൽ.
ചവറയിൽ ഇടതു സ്വതന്ത്രനായി മത്സരിച്ചാണ് വിജയൻ പിള്ള 2016ൽ നിയമസഭയിലെത്തിയത്. ചവറ നിയമസഭാ മണ്ഡലം രൂപീകരിച്ച ശേഷമുള്ള ആദ്യ ആർ.എസ്.പി ഇതര എം.എൽ.എ ആണ്. 1951ൽ ജനിച്ച വിജയൻപിള്ള പിതാവിന്റെ പാത പിന്തുടർന്ന് രാഷ്ട്രീയത്തിലേക്ക് എത്തി. ആർ.എസ്.പിയിലൂടെയാണ് രാഷ്ട്രീയ ജീവിതം ആരംഭിച്ചത്.
ആര്‍.എസ്.പി ബേബി ജോണ്‍ വിഭാഗ നേതാവായിരുന്ന വിജയന്‍ പിള്ള,ബേബി ജോണിന്റെ മരണശേഷം കെ. കരുണാകരന്‍ രൂപീകരിച്ച ഡി.ഐ.സിയുമായി സഹകരിച്ചു. ഡി.ഐ.സി കോണ്‍ഗ്രസില്‍ ലയിച്ചപ്പോള്‍ വിജയന്‍പിള്ള കോണ്‍ഗ്രസില്‍ തിരിച്ചെത്തി. 2011ലെ യുഡിഎഫ് സർക്കാരിന്റെ കാലത്ത് വി.എം.സുധീരന്റെ മദ്യനയത്തിൽ പ്രതിഷേധിച്ച് കോൺഗ്രസ് വിട്ടു. 2016ൽ മുൻ മന്ത്രിയും ബേബിജോണിന്റെ മകനുമായ ഷിബുബേബി ജോണിനെ പരാജയപ്പെടുത്തിയാണ് നിയമസഭയിലേക്കെത്തിയത്.