തിരുവനന്തപുരം: മദ്യലഹരിയിൽ വ്യവസായി ഓടിച്ച കാറിടിച്ച് യുവാവ് മരിച്ചു. ബി.എസ്.എൻ.എൽ കരാർ തൊഴിലാളിയായ ജോൺ ഫ്രെഡോ ആണ് മരിച്ചത്. ഇന്നലെ രാത്രി 11.15ഓടെ അമ്പലമുക്ക് കുരിശടി ജംഗ്ഷനിലാണ് സംഭവം.സംഭവത്തിൽ അമ്പലമുക്ക് സ്വദേശി അജയ് ഘോഷിനെ പൊലീസ് അറസ്റ്റ് ചെയ്തു.

റോഡിൽ കേബിൾ ഇടുന്നതിനായി ഒരുവശത്ത് ബാരിക്കേഡ് സ്ഥാപിച്ച ശേഷം ജോലികൾ നടക്കുകയായിരുന്നു. ഇതുവഴി ഗതാഗതവും തിരിച്ചുവിട്ടിരുന്നു. പേരൂർക്കടയിൽ നിന്ന് അമ്പലമുക്കിലേക്ക് അമിതവേഗത്തിലെത്തിയ കാർ ബാരിക്കേഡിലേക്ക് ഇടിച്ചുകയറുകയായിരുന്നു. കാറിന്റെ വരവുകണ്ട് മറ്റ് തൊഴിലാളികൾ ഓടിമാറിയെങ്കിലും ജോൺ കാറിനും ബാരിക്കേഡിനും ഇടയിൽ അകപ്പെടുകയായിരുന്നു. ഗുരുതരമായി പരിക്കേറ്റ ജോണിനെ ഉടൻ പേരൂർക്കട പൊലീസെത്തി മെഡിക്കൽ കോളേജ് ആശുപത്രിയിൽ പ്രവേശിപ്പിച്ചെങ്കിലും മരണം സംഭവിച്ചു.