കോട്ടയം : കൊറോണ (കോവിഡ് 19)​ പ്രതിരോധപ്രവർത്തനങ്ങളുടെ ഭാഗമായി കോട്ടയം ജില്ലയിൽ ആരാധനാലയങ്ങളിലെ ചടങ്ങുകൾക്ക് നിയന്ത്രണം ഏർപ്പെടുത്തി. മെഡി.കോളജിലെ ഐസോലേഷൻ വാർഡിൽ ഏഴുപേർ നിരീക്ഷണത്തിലാണ്. രോഗലക്ഷണമുളള നാലുപേരുടെ സ്രവം പരിശോധനയ്ക്കയച്ചു. കോട്ടയം ജില്ലയിലെ വിദ്യാഭ്യാസ സ്ഥാപനങ്ങൾക്ക് നാളെ കളക്ടർ അവധി പ്രഖ്യാപിച്ചു.

പത്തനംതിട്ട ജില്ലയിൽ സ്കൂൾ വാർഷികങ്ങൾക്ക് വിലക്കേർപ്പെടുത്തി. ഓമല്ലൂർ വയൽവാണിഭവും ക്ഷേത്രോത്സവങ്ങളും റദ്ദാക്കാനും തീരുമാനിച്ചു. അന്നദാനവും, സമൂഹസദ്യയും പാടില്ലെന്ന നിർദ്ദേശവും നൽകിയിട്ടുണ്ട്. ശവസംസ്കാര ചടങ്ങുകളിൽ ആളുകളെ കുറയ്ക്കണമന്നതടക്കമുള്ള നിർദ്ദേശമാണ് നല്‍കിയിരിക്കുന്നത്. മുസ്ലീം പള്ളികളിൽ പൊതുഇടത്തിലെ ദേഹശുദ്ധി നിറുത്തണമെന്ന നിർദ്ദേശവും ഉണ്ട്.

ജില്ലാ ആശുപത്രിയിലെ ഐസലേഷൻ വാർഡിൽ മൂന്നുപേരെകൂടി പ്രവേശിപ്പിച്ചു. എഴുപേരെക്കൂടി ഐസോലേഷൻ വാർഡിലേയ്ക്ക് മാറ്റും. രോഗലക്ഷണങ്ങൾ പ്രകടമായതിനെതുടർന്നാണിത്. വയോധികരായ രണ്ടുപേരെ പത്തനംതിട്ട ജനറൽ ആശുപത്രിയിൽ നിന്ന് കോട്ടയം മെഡിക്കൽ കോളേജ് ആശുപത്രിയിലേയ്ക്ക് മാറ്റിയിരുന്നു. വീടുകളിൽ നിരീക്ഷണത്തിലുള്ളവരെ ആരോഗ്യപ്രവർത്തകർ കൃത്യമായ ഇടവേളകളിൽ പരിശോധിക്കുന്നുണ്ട്. ജില്ലയിലെ കോടതികൾ ഈ മാസം പതിമൂന്നുവരെയുള്ള സിറ്റിംഗ് ഒഴിവാക്കി.