റിയാദ്: സൗദി അറേബ്യയിൽ കൊറോണ രോഗബാധ സംശയിക്കുന്ന മലയാളിയും നിരീക്ഷണത്തിൽ. ഇക്കഴിഞ്ഞ ദിവസങ്ങളിൽ വിനോദയാത്ര നടത്തിയ ശേഷം വിദേശത്ത് നിന്ന് റിയാദിൽ തിരിച്ചെത്തിയ മലപ്പുറം സ്വദേശിയാണ് സൗദി ആരോഗ്യമന്ത്രാലയത്തി​ന്റെ നിരീക്ഷണത്തിൽ കഴിയുന്നത്. ഒരാഴ്ചയായി ഇദ്ദേഹം പ്രത്യേക നിരീക്ഷണ കേന്ദ്രത്തിലാണെന്നാണ് വിവരം.

റിയാദ് എയർേപ്പാർട്ടിലിറങ്ങി താമസസ്ഥലത്ത് എത്തിയ ഇയാളെ പിന്നീട് ആരോഗ്യമന്ത്രാലയം വിളിച്ചു വരുത്തി നിരീക്ഷണ കേന്ദ്രത്തിലേക്ക് മാറ്റുകയായിരുന്നു. രോഗമോ രോഗ ലക്ഷണമോ ഇല്ലെങ്കിലും 14 ദിവസത്തെ നിരീക്ഷണം ആവശ്യമാണെന്ന് അധികൃതർ പറഞ്ഞതായി ഇയാൾ പറയുന്നു. സ്രവ പരിശോധനയിൽ ഇയാൾക്ക് വൈറസ് ബാധയില്ലെന്ന് കണ്ടെത്തിയിട്ടുണ്ട്. ഇനിയും രോഗലക്ഷണങ്ങൾ ഒന്നും ഇല്ലെങ്കിൽ അടുത്ത ദിവസം തന്നെ നിരീക്ഷണ കേന്ദ്രം വിടാനാകുമെന്ന് അധികൃതർ അറിയിച്ചിട്ടുണ്ട്.