കൊച്ചി:സ്വർണവില റെക്കാഡ് കുതിപ്പിന് താത്കാലിക വിരാമമിട്ട് ഇന്നലെ കുത്തനെ ഇടിഞ്ഞു. കേരളത്തിൽ പവന് 1,​200 രൂപ കുറഞ്ഞ് 30,​600 രൂപയായി. ഗ്രാമിന് 150 രൂപ കുറഞ്ഞ് 3,​825 രൂപയിലെത്തി. ഒറ്റ ദിവസം സ്വർണത്തിന് ഇത്രയും വിലകുറയുന്നത് അത്യപൂർവമാണ്.

മാർച്ച് ആറിന് വില സർവകാല റെക്കാഡ് കുറിച്ചിരുന്നു. അന്ന്,​ പവന് 32,​320 രൂപയും ഗ്രാമിന് 4,​040 രൂപയുമായിരുന്നു വില.

രാജ്യാന്തര വില ഔൺസിന് ഏഴു വർഷത്തെ ഉയരത്തിൽ നിന്ന് ഇന്നലെ 1,​555 ഡോളറിലേക്ക് താഴ്‌ന്നത് ഇന്ത്യയിലും വില കുറയാൻ സഹായിച്ചു. കഴിഞ്ഞ മാസാന്ത്യം 1,​700 ഡോളർ വരെ എത്തിയിരുന്നു. ഡോളറിനെതിരെ രൂപയുടെ മൂല്യം വ്യാഴാഴ്‌ച 74.28 വരെ കൂപ്പുകുത്തിയിരുന്നു. ഇന്നലെ മൂല്യം 73 നിലവാരത്തിൽ ആയതും സ്വർണവില താഴാൻ വഴിയൊരുക്കി.

എന്തുകൊണ്ട്

വില ഇടിവ് ?​

കൊറോണ, ആഗോള സമ്പദ്‌വളർച്ചയെ കുത്തനെ ഇടിക്കുമെന്ന ഭീതി മൂലം ഓഹരി-കടപ്പത്ര വിപണികൾ നേരിട്ട തകർച്ച സ്വർണ വില വർദ്ധിപ്പിച്ചിരുന്നു. നിക്ഷേപകർ ഓഹരി വിപണി വിട്ട് സ്വർണത്തിലേക്ക് പണമൊഴുക്കി. ഓഹരികൾ ഒരു പരിധിയിൽ കൂടുതൽ തകരുന്നത് അഭികാമ്യമല്ല എന്ന ബ്രോക്കർമാരുടെ മുന്നറിയിപ്പ് (മാർജിൻ കോൾ)​ ഇന്നലെയുണ്ടായി. തുടർന്ന്,​ സ്വർണത്തിൽ നിന്ന് പണം പിൻവലിച്ച്,​ നിക്ഷേപകർ വീണ്ടും ഓഹരികളിലേക്ക് തിരിച്ചെത്തിയത് സ്വർണവില ഇടിയാൻ കാരണമായി.